Read Библија, Константинов Михеј 6 Bible Online

Михеј 6 - Библија, Константинов bible

Михеј 6

¹Чујте сега што зборува Господ: „Стани! Суди се пред горите, и бреговите нека го чујат твојот глас!

²Гори слушајте ја Господовата пресуда, основи на земјата, чујте, зашто Господ се суди со Својот народ, Тој се суди со Израел:

³Народе Мој, што ти сторив? Со што те изморив? Одговорете против Мене,

⁴Јас те изведов тебе од Египетската Земја, те избавив од куќата на ропството; го испратив пред тебе Мојсеја, Арона и Маријам.

⁵Народе Мој, спомни си сега: Што беше наумил Валак, моавскиот цар? Што му одговори нему Валаам, синот Веоров, (спомнете си за сè збиднато) ... од Ситим до Галгал, за да ги познаеш праведните Господови дела?”

⁶Со што ќе дојдам пред Господа, ќе паднам ли ничкум пред Сèвишниот Бог? Ќе дојдам ли пред Него со жртва паленица, со телиња годиначиња?

⁷Дали ќе Му бидат мили илјада овни, илјада илјади потоци масло? Треба ли да се принесе првородениот син заради својот престап, плодот на својата утроба заради гревот на мојата душа?

⁸Човеку, објавено ти е, што е добро, што бара Господ од тебе: да се прави само правда, да се љуби милосрдието и да се оди смирено со својот Бог.

⁹Господовиот глас му вика на градот и мудроста ќе го види Твоето Име: „Слушајте го жезалот и Оној, Кој го определил.

¹⁰Зар можам да го поднесувам богатството во домот на безбожниците, со проклета неполна ефа?

¹¹Можам ли да го оправдам оној кој се служи со крива мерка, со вреќа со измамливи мерилки?

¹²Вашите богаташи полни се со насилство, вашите жители зборуваат лага, измамлив е јазикот во нивната уста!

¹³Затоа и Јас почнав да те удирам, да те истребувам заради твоите гревови.

¹⁴Ќе јадеш, а нема да се наситиш, ќе останеш гладен; ќе оставаш настрана и ништо не ќе сочуваш; ако и запазиш нешто, Јас ќе го предадам на меч.

¹⁵Ќе сееш, но нема да жнееш; ќе ја цедиш маслинката, а не ќе се намажеш со масло; ќе газиш грозје, а не ќе пиеш вино.

¹⁶Ги пазиш Амриевите закони и сите дела на Ахавовиот дом, живееш според нивните совети: ќе направам пустина од тебе, потсмев од твоите жители, за да го носите срамот на многу народи.”