Read Библија, Константинов Захарија 3 Bible Online

Захарија 3 - Библија, Константинов bible

Захарија 3

¹Потоа ми го покажа Исуса, велесвештеникот, Кој стоеше пред Господовиот ангел, и сатаната, што му стоеше оддесно за да го обвинува.

²Господ му рече на сатаната: „Господ да те прекори сатано! Господ, Кој го избра Ерусалим, да те прекори! Не е ли Тој гламна извадена од оган?”

³А Исус беше облечен во валкани облеки додека стоеше пред Господовиот ангел.

⁴Ангелот им се обрати на оние кои што стоеја пред него и им рече: „Соблечете ги од него тие валкани облеки!” И му рече: „Еве, ја симнувам од тебе твојата вина и те облекувам во скапоцена облека!”

⁵И продолжи: „Ставете му чиста капа на главата!” Тие му ставија чиста капа на главата и го облекоа во скапоцена облека во присуство на Господовиот ангел.

⁶И Господовиот ангел го опомена Исуса:

⁷„Господ над Воинствата зборува вака: Ако одиш по моите патишта и ако ги пазиш моите наредби, ти ќе бидеш управител во Мојот Дом, ќе ги чуваш Моите дворови и ќе ти дадам пристап меѓу оние кои стојат таму.

⁸И така, послушај Исусе, велесвештенику, ти и твоите другари кои се околу тебе, зашто вие сте луѓе познати! Еве, Јас ќе го доведам подникот, Мојот Слуга, и ќе ја отстранам нечесноста на оваа земја во еден ден.

⁹Зашто еве го каменот што го ставам пред Исуса; на тој камен се седум очи, и врз него ќе врежам натпис - слово е на Господа над Војските.

¹⁰Во оној ден - слово е на Господа над Војските - ќе се повикувате еден друг под лозата и под смоквата.”