Read Библија, Константинов Матеј 23 Bible Online

Матеј 23 - Библија, Константинов bible

Матеј 23

¹Тогаш Исус му рече на народот и на Своите ученици;

²говорејќи: „На Мојсеевото седиште седнаа книжниците и фарисеите,

³затоа сè што ќе ви речат - правете и пазете - но не постапувајте според нивните дела, зашто зборуваат, а не извршуваат!

⁴Туку врзуваат тешки и неподносливи бремиња и ги ставаат врз плеќите на луѓето, а самите не сакаат ни со прст да ги помрднат.

⁵А сите свои дела ги прават, за да ги видат луѓето; затоа ги рашируваат своите молитвени записи и ги прават големи ресите на облеките;

⁶ги сакаат: челните места по гозбите и првите места во синагогите;

⁷поздравите на јавните места и луѓето да ги наречуваат ‘рави’.

⁸А вие не наречувајте се учители - зашто е Еден вашиот Учител - Христос, а вие сите сте браќа.

⁹И никого на земјата не наречувајте го свој ‘татко’, зашто е Еден вашиот небесен Татко.

¹⁰Ниту се наречувајте наставници, зашто е Еден вашиот Наставник - Христос.

¹¹А поголемиот меѓу вас нека ви биде слуга.

¹²Кој се воздига себеси - ќе биде понизен; а кој се понизува себеси - ќе биде возвишен.”

¹³”Горко вам, книжници и фарисеи, лицемери, кои го затворате Небесното царство пред луѓето; зашто самите не влегувате, ниту ги пуштате внатре оние, кои сакаат да влезат.”

¹⁴”Горко вам, книжници и фарисеи, лицемери, зашто ги подјадувате домовите на вдовиците, и заради причина се молите долго. Затоа ќе добиете поголема осуда!”

¹⁵”Горко вам, книжници и фарисеи, лицемери, кои ги обиколувате морето и копното, за да придобиете еден прозелит, и кога ќе стане тоа, го правите син на пеколот, двапати полош од себе!”

¹⁶”Горко вам, слепи водачи, кои велите: ‘Ако некој се заколне во Храмот, не е ништо; ако пак се заколне во црковното злато, тогаш е обврзан!’

¹⁷Безумни и слепи! Што е поголемо: златото или Храмот, што го осветува златото?

¹⁸И: ‘Ако некој се заколне во жртвеникот, не е ништо; а ако се заколне во дарот, што е врз него, тогаш е обврзан.’

¹⁹Слепци! Што е поголемо: дарот или жртвеникот, што го осветува дарот?

²⁰И така, кој се колне во жртвеникот, се колне во него и во сè што е врз него.

²¹И кој се колне во Храмот, се колне во него и во Оној, Кој живее во него.

²²И кој се колне во небото, се колне во Божјиот престол и во Оној, Кој седи на него.”

²³”Горко вам, книжници и фарисеи, лицемери, кои давате десеток од нане, копра и кимин, а го оставивте поважното во Законот: правдата, милоста и верата. Ова требаше да се прави, а она да не се остава!

²⁴Слепи водачи! Вие го цедите комарецот, а ја проголтувате камилата.”

²⁵”Горко вам, книжници и фарисеи, лицемери, кои ја чистите надворешноста на чашата и чинијата, а внатре сте полни со грабеж и лакомост!

²⁶Слепи фарисеју! Очисти ја најнапред внатрешноста на чашата, за да и биде чиста и надворешноста!”

²⁷”Горко вам, книжници и фарисеи, лицемери, оти приличите на варосани гробови, што однадвор изгледаат убаво, а внатре се полни со мртовечки коски и секаква нечистота!

²⁸Така и вие однадвор им се покажувате праведни на луѓето, а внатре сте полни со лицемерство и беззаконие.”

²⁹”Горко вам, книжници и фарисеи, лицемери, кои им градите гробови на пророците и им ги украсувате спомениците на праведните,

³⁰и велите: „ Ако живеевме во деновите на нашите татковци, не ќе бевме нивни соучесници во крвта на пророците.”

³¹Така сведочите за себе, дека сте синови на оние, кои ги убиле пророците.

³²И вие ја дополнивте мерата на вашите татковци!

³³Змии, змиски породи! како ќе побегнете од судот на пеколот?

³⁴Затоа, еве, Јас ви праќам: пророци, и мудреци, и книжници. Од нив едните ќе ги убиете и распнете, а другите ќе ги бичувате во вашите синагоги и ќе ги гоните од град до град,

³⁵за да дојде врз вас сета праведна крв, пролеана на земјата, од крвта на праведниот Авел до крвта на Захарија, синот Варахиин, кого го убивте меѓу Храмот и жртвеникот.

³⁶Вистина ви велам, сето тоа ќе дојде врз ова поколение.”

³⁷”Ерусалиме! Ерусалиме, што ги убиваш пророците и што ги каменуваш испратените при тебе! Колку пати сакав да ги соберам твоите деца, како што квачката ги собира своите пилиња под крилата, но не сакавте!

³⁸Еве, ви се остава вашиот дом пуст!

³⁹Зашто ви велам: отсега нема да Ме видите додека не речете: „Благословен е Оној, Кој доаѓа во Господово име!”