Read Библија, Константинов Лука 17 Bible Online

Лука 17 - Библија, Константинов bible

Лука 17

¹И им рече на Своите ученици: „Не е можно да не дојдат соблазни, но горко на оној, преку кого доаѓаат!

²Подобро би било за него да му биде обесен мелнички камен на вратот и да го фрлат во морето, отколку да соблазни еден од маливе.

³Внимавајте на себе! Ако ти згреши твојот брат, укори го и прости му, ако се покае.

⁴Ако и седумпати на ден, згреши против тебе и седумпати се обрати кон тебе и рече: ‘Се кајам!’- прости му!”

⁵Апостолите Му рекоа на Господа: „Придај ни вера!”

⁶А Господ рече: „Ако навистина имате вера колку синаповото зрно - ќе и речете на црницава: „Откорни се и пресади се во морето!” И таа би ве послушала.”

⁷”Кој од вас - ако има слуга - кој ора или го чува стадото, ќе му рече, кога ќе се врати од поле: „Дојди бргу и прилегни покрај трпезава!”

⁸Нема ли да му каже: ‘Приготви ми нешто за вечера и препаши се, за да ми служиш додека јадам и пијам, а потоа и ти јади и пиј!’

⁹Зар ќе му благодари на слугата, што ја исполнил заповедта?

¹⁰Така и вие, кога исполнивте сè што ви е заповедано, речете: ‘Ние сме неполезни слуги; зашто го извршивме она, што бевме должни да го извршиме.’”

¹¹И кога одеше за Ерусалим, поминуваше меѓу Самарија и Галилеја.

¹²И кога влегуваше во едно село, го сретнаа десет лепрозни мажи, кои застанаа подалеку

¹³и го поткренаа гласот, велејќи: „Исусе, Учителе, смилувај ни се!”

¹⁴А кога ги виде, им рече: „Одете и покажете им се на свештениците!” И се очистија додека одеа.

¹⁵А еден од нив, кога виде дека оздравел, се врати славејќи Го Бога гласно.

¹⁶И падна на лице при Неговите нозе и Му благодари. А тој беше Самарјанец.

¹⁷Тогаш Исус одговори и рече: „Зар не се очистија десетмина? Каде се уште деветте?

¹⁸Не најдоа ли да се вратат и да Му благодарат на Бога, освен овој туѓинец!”

¹⁹И му рече: „Стани и оди си, твојата вера те спаси!”

²⁰А кога фарисеите Го прашаа: „Кога ќе дојде Божјото Царство?” Тој им одговори и рече: „Божјото Царство не доаѓа така, за да може да се види;

²¹ниту ќе се рече: ‘Еве го тука, или онаму!’ - зашто, ете, Божјото Царство е во вашата средина.

²²А на учениците им рече: „Ќе дојдат дни, кога ќе посакате да видите само еден ден од деновите на Човечкиот Син, и не ќе го видите.

²³И ќе ви зборуваат: ‘Еве Го тука!’ или ‘Ене Го онаму!’ Не одете таму и не трчајте по нив!

²⁴Зашто како што молњата, која светнува - од едниот крај под небото - и го осветлува другиот крај, така ќе биде Човечкиот Син во Својот Ден.

²⁵Но, прво Тој треба да претрпи многу и да биде отфрлен од ова поколение.

²⁶И како што беше во Ноевите дни, така ќе биде и во деновите на Човечкиот Син:

²⁷јадеја, пиеја, се женеа и се мажеа, сè до денот кога Ное влезе во Ковчегот; и дојде потопот и ги уништи сите.

²⁸Исто така, како што беше во Лотовите дни: јадеа, пиеја, купуваа, продаваа, садеа, ѕидаа;

²⁹а во денот кога Лот излезе од Содом, падна од небото оган и сулфур и ги уништи сите.

³⁰Исто така ќе биде во оној Ден, кога ќе се јави Човечкиот Син.

³¹Во тој Ден, кој ќе биде на покривот, а неговата покуќнина е во домот, нека не слегува да ја земе! Исто така, кој ќе биде во полето, нека не се враќа кон останатите работи.

³²Спомнете си за Лотовата жена.

³³Кој сака да ја запази својата душа, ќе ја изгуби; а кој ќе ја изгуби, ќе ја запази.

³⁴Ви велам - во таа ноќ, двајца ќе бидат во една постела, едниот ќе биде однесен, а другиот ќе биде оставен.

³⁵Две жени ќе мелат заедно, едната ќе биде однесена, а другата ќе биде оставена.

³⁶Двајца ќе бидат на нива, едниот ќе биде однесен, а другиот ќе биде оставен.”

³⁷Тогаш проговорија и Му рекоа: „Каде Господи?” А Тој им рече: „Каде е трупот, таму ќе се собираат и орлите!”