Read Библија, Константинов Лука 21 Bible Online

Лука 21 - Библија, Константинов bible

Лука 21

¹А кога ги подигна очите, виде како богатите ги пуштаат своите дарови во благајната.

²А виде и една бедна вдовица, како пушти таму две лепти,

³и рече: „Вистина ви велам, беднава вдовица пушти повеќе од сите,

⁴зашто сите овие приложија дар за Бога, од својот вишок; а таа од својата немаштија: пушти сè што имаше за живеење.”

⁵И кога некои зборуваа за Храмот дека е украсен со убави камења и со заветни дарови, Тој им рече:

⁶”Ќе дојдат дни кога од ова што го гледате, не ќе остане ни камен на камен, што не ќе биде урнат!”

⁷А тие Го прашаа, велејќи: „Учителе, кога ќе биде тоа, и каков е знакот, дека тоа ќе стане?”

⁸Тој пак рече: „Внимавајте да не ве заведат, зашто мнозина ќе дојдат во Мое име и ќе речат: ‘Јас сум’ и ‘времето приближило!’ Не одете по нив!

⁹Кога ќе чуете за војни и буни, не плашете се! Зашто тоа треба прво да стане, но не е веднаш свршетокот!”

¹⁰Тогаш им рече: „Ќе се подигне народ против народ и царство против царство;

¹¹ќе има големи земјотреси, а на разни места ќе има глад и помор; ќе има стравотии и големи знаци на небото.

¹²Но пред сè тоа, ќе стават раце на вас и ќе ве гонат; ќе ве предаваат во синагогите и во темници; ќе ве водат пред цареви и управители заради Моето име.

¹³Тоа ќе ви овозможи да сведочите.

¹⁴И така, ставете си во своите срца, да не се подготвувате како ќе се браните,

¹⁵зашто Јас ќе ви дадам уста и мудрост, на која не ќе можат да и се спротиват и да и противречат сите ваши непријатели.

¹⁶А ќе ве предаваат и родителите, и браќата, и роднините и пријателите, и ќе убијат некои од вас;

¹⁷и сите ќе ве мразат, заради Моето име.

¹⁸Но вам нема да ви пропадне ни влакно од главата.

¹⁹Со своето трпение ќе ги спасите своите души!”

²⁰”А кога ќе го видите Ерусалим дека е опколен од војски, знајте дека е близу неговото запустување.

²¹Тогаш оние, кои се во Јудеја нека бегаат во планините; а кои се во градот нека излезат надвор; а кои се во полето, нека не влегуваат во градот!

²²Зашто тоа се дни на одмазда, за да се исполни сè што е напишано!

²³Горко им на бремените и на доилките во тие дни, зашто ќе има голема неволја во земјата и гнев врз овој народ.

²⁴Ќе паѓаат од сечилото на мечот, и ќе ги одведуваат во ропство меѓу сите народи; а народите ќе го газат Ерусалим, додека не се исполнат времињата на народите.”

²⁵И ќе има знаци на сонцето, на месечината и на ѕвездите; а на земјата народите ќе бидат опфатени од страв и збунетост од бучењето и од морските бранови;

²⁶луѓето ќе примираат од страв, од исчекувањето на она, што ќе го најде светот, зашто небесните сили ќе се затресат.

²⁷И тогаш ќе Го видат Човечкиот Син како доаѓа на облак со голема сила и слава.

²⁸А кога ќе почне да се случува тоа, исправете се и подигнете ги главите, зашто се приближи вашето избавување.”

²⁹Потоа им кажа парабола: „Погледајте ги смоквата и сите дрвја;

³⁰кога ќе видите дека развиваат, сами знаете дека летото е веќе близу.

³¹Така и вие, кога ќе видите дека ова се збиднува, знајте дека Божјото Царство е близу!

³²Вистина ви велам, дека ова поколение нема да помине, додека сè ова не се збидне.

³³Небото и земјата ќе поминат, но Моите зборови нема да поминат.”

³⁴”Но, внимавајте на себеси, вашите срца да не бидат оптоварени со прејадување и пијанство, со животни грижи и да не ве затече ненадејно оној ден,

³⁵зашто како примка ќе дојде за сите кои живеат по целата земја.

³⁶Туку, бдејте и молете се во секое време, за да успеете да избегнете од сето ова што ќе настане, и да застанете пред Човечкиот Син.”

³⁷Дење поучуваше во Храмот, а ноќе излегуваше и ноќеваше на гората наречена Маслинова.

³⁸И сиот народ рано наутро доаѓаше при Него во Храмот, за да Го слуша.