Read Библија, Константинов ВтЗакон. (5 Moj.) 25 Bible Online

ВтЗакон. (5 Moj.) 25 - Библија, Константинов bible

ВтЗакон. (5 Moj.) 25

¹„Кога ќе стане караница меѓу луѓето, и дојдат на суд за да им се суди, нека му се даде правото на оној кој е прав, а виновникот нека биде осуден.

²Ако кривецот заслужува да биде бичуван, судијата нека му нареди да легне, и тука пред него нека му избројат онолку удари колку му следуваат според неговата вина.

³Можат да му се одредат до четириесет удари, но не повеќе, за да не биде преголемо синилото, па да не се понижи пред тебе твојот брат, кога би му удриле повеќе удари.

⁴Не заврзувај му ја устата на волот кога врши.

⁵Кога браќата живеат заедно па едниот од нив умре, а да немал син, жената на покојниот нека не се премажува надвор од куќата, туку нека и пристапи кон неа нејзиниот девер и нека си ја земе за жена, па да ја изврши деверската должност.

⁶А првиот син што таа ќе го роди нека му остане по име на неговиот брат, за да не изумре неговото име во Израел.

⁷Ако, меѓутоа, човекот не сака да се ожени со својата снаа, тогаш неговата снаа нека дојде при вратата пред старешините и рече: ‘Мојот девер не сака да го запази името на својот брат во Израел; не сака да ми ја исполни деверската должност.’

⁸Старешините на неговиот град нека го повикаат и нека го прашаат. Ако биде упорен и рече: ‘Не сакам да се женам со неа,’

⁹неговата снаа нека пристапи кон него, пред очите на старешините, па нека му ја извади обувката од ногата, нека му плукне во лицето и нека ги рече овие зборови: ‘Вака му се прави на човек, кој не сака да го подигне домот на својот брат!’

¹⁰Тој нека биде наречен во Израел: „Дом на босиот.”

¹¹Ако двајца се степат, па жената на едниот тргне да го избави својот маж од рацете на оној кој го бие, и таа ја испружи својата рака и го фати оној за срамниот член,

¹²отсечи и ја раката, и нека не ја сожалува твоето око.

¹³Не носи двоен тег во торбата, поголем и помал.

¹⁴Во својата куќа пак не држи двојна ефа: поголема и помала.

¹⁵Тегот нека ти е потполн и точен, и ефата нека ти е потполна и точна, за да живееш долго во земјата која ти ја дава Господ, твојот Бог.

¹⁶Па на Господа на твојот Бог, му е одвратен оној кој го прави тоа, кој прави неправда.

¹⁷Спомни си за она што ти направи Амалик додека бевте на пат, откако излеговте од Египет;

¹⁸како те пречека на патот и ги истепа во твојата заднина сите немоќни, кога беше уморен и исцрпен, зашто не се боеше од Бога.

¹⁹И затоа, кога Господ, твојот Бог, те смири од сите твои непријатели наоколу во земјата која Господ, твојот Бог, ти ја дава во наследство, избриши го под небото споменот на Амалика. Не заборавај!”