Read Библија, Константинов Јован 1 Bible Online

Јован 1 - Библија, Константинов bible

Јован 1

¹Во почеток беше Словото, и Словото беше во Бога, и Словото беше Бог.

²Тоа беше во почетокот во Бога.

³Сè стана преку Него, и ништо, што стана, не стана без Него.

⁴Во Него беше живот и животот им беше светлина на луѓето.

⁵И светлината свети во темнина, и темнината не ја опфати.

⁶Се јави човек, испратен од Бога, по име Јован.

⁷Тој дојде за сведоштво, за да сведочи за Светлината, та сите да поверуваат преку него.

⁸Тој не беше светлина, туку да сведочи за Светлината.

⁹Вистинската Светлина, Која го осветлува секој човек, доаѓаше во светот.

¹⁰Беше во светот, и светот стана преку Него, но светот не Го позна.

¹¹Дојде при Своите, но Неговите не Го примија.

¹²А на сите кои Го примија, им даде власт да станат Божји деца, на оние кои веруваат во Неговото име:

¹³кои не се родија ниту од крв, ниту од телесна похот, ни од волја на маж, туку од Бога.

¹⁴И Словото стана тело и се настани меѓу нас и ја видовме Неговата слава, славата што ја има како Единороден од Таткото - полн со благодат и вистина.

¹⁵Јован сведочи за Него и вика: „Еве Го Оној, за Кого реков: Оној, Кој доаѓа после мене, пред мене е, зашто беше пред мене!”

¹⁶И, сите ние примивме од Неговата полнота: благодат врз благодат.

¹⁷Зашто, Законот беше даден преку Мојсеја, а преку Исуса Христа дојдоа благодатта и вистината.

¹⁸Бога никој никогаш не Го видел; Единородниот СинБог, Кој е во прегратката на Таткото, Тој Го објави.”

¹⁹А ова е Јовановото сведоштво, кога Јудејците од Ерусалим му испратија свештеници и левити, за да го прашаат: „Кој си ти?”

²⁰И призна и не одрече, та исповеда: „Јас не сум Христос.”

²¹И го прашаа: „Тогаш што! Илија ли си?” „Не сум,” одговори. „Да не си пророк?” „Не,” одговори.

²²Тогаш му рекоа: „Кој си? за да можеме да им одговориме на оние, кои нè испратија! Што велиш ти за себеси?”

²³Рече: „Јас сум глас на оној, кој вика во пустината: израмнете го Господовиот пат,” како што рече пророкот Исаија.”

²⁴Испратените беа фарисеи.

²⁵Тие го прашаа и му рекоа: „Тогаш зошто крштаваш, кога не си Христос, ниту Илија, ни пророк?”

²⁶”Јас крштавам со вода им одговори Јован - но меѓу вас стои Еден, Кого вие не Го познавате.

²⁷Тој е Оној Кој доаѓа по мене, Кој беше пред мене, Кому јас не сум достоен да му го одврзам ременот на Неговите обувки.”

²⁸Тоа се случи во Витавара, од онаа страна на Јордан, каде што крштаваше Јован.

²⁹Утреден Јован Го виде Исуса како доаѓа при него и рече: „Еве Го Божјото Јагне, Кое ги зема гревовите на светот!

³⁰Овој е Оној за Кого ви реков: „По мене доаѓа Човек, Кој постоеше пред мене, зашто беше пред мене.”

³¹Јас не Го познавав. Но затоа дојдов да крштавам во вода, за да му Го објавам на Израел.”

³²Јован сведочеше уште: „Го видов Духот да слегува од небото како гулаб, и застана над Него.

³³Јас не Го познавав, но Оној Кој ме испрати да крштавам во вода ми рече: „Врз Кого ќе видиш да слегува Духот и да останува над Него, Тој е Оној, Кој ќе крштава во Светиот Дух.”

³⁴И јас видов и сведочам дека Тој е Божји Син.”

³⁵Идниот ден, Јован стоеше пак и двајца од неговите ученици,

³⁶и штом Го виде Исуса да поминува, рече: „Еве Го Божјото Јагне!”

³⁷Кога ги чуја од него тие зборови, обата ученика тргнаа по Исуса.

³⁸Исус се заврти и, кога виде дека идат по Него, ги праша: „Што барате?” Тие Му одговорија: „Рави (што значи учител) каде живееш?”

³⁹”Дојдете и видете!” им одговори. И така, отидоа да видат каде живее, и останаа при Него оној ден. Тоа беше околу десеттиот час.

⁴⁰Еден од двајцата кои тргнаа по Исуса, откако ги чуја Јовановите зборови, беше Андреј, братот на Симона Петра.

⁴¹Тој го најде првин брата си Симона и му рече: „Го најдовме Месијата, што значи Христос (Помазаник).”

⁴²И го доведе при Исуса. А Исус, гледајќи го му рече: „Ти си Симон, синот Јонин; ти ќе се наречеш Кифа, што значи камен (Петар).”

⁴³На другиот ден Исус посака да отиде во Галилеја, и го најде Филипа. И му рече: „Дојди по Мене!”

⁴⁴Филип беше од Витсаида, од Петровиот и Андреевиот град.

⁴⁵Филип го сретна Натанаила и му рече: „Го најдовме Оној за Кого пишува Мојсеј во Законот и Пророците: Исуса, синот Јосифов од Назарет.”

⁴⁶”Може ли да излезе нешто добро од Назарет?”, му рече Натанаил. „Дојди и види”, му одговори Филип.

⁴⁷Исус го забележа Натанаила, како Му се приближува, и рече за него: „Еве, вистински Израелец, во кого нема лукавство.”

⁴⁸”Откаде ме познаваш?”, го праша Натанаил. „Уште пред да те повика Филип - му одговори Исус - те видов под смоквата.”

⁴⁹”Рави! - му одговори Натанаил - Ти си Божји Син! Ти си Израелев Цар!”

⁵⁰Исус во одговор му рече: „Веруваш, зашто ти реков дека те видов под смоквата! Ќе видиш и повеќе од тоа!”

⁵¹И му рече: „Вистина, вистина ви велам: отсега ќе го видите небото отворено и Божјите ангели како се искачуваат и слегуваат над Човечкиот Син.”