Read Библија, Константинов Јован 10 Bible Online

Јован 10 - Библија, Константинов bible

Јован 10

¹„Вистина, вистина ви велам, кој не влегува низ вратата во овчарникот, а прескокнува од друга страна, тој е крадец и разбојник.

²А кој влегува низ вратата пастир е на овците.

³Нему вратарот му отвора, а овците го слушаат неговиот глас, и ги вика своите овци по име и ги изведува.

⁴Кога ќе ги истера своите овци, оди пред нив и овците одат по него, зашто го познаваат неговиот глас.

⁵По туѓинец никако не одат, туку ќе побегнат од него, зашто не го познаваат гласот на туѓинците.”

⁶Исус им ја кажа оваа споредба, но тие не разбраа што беше тоа за кое им зборуваше.

⁷Исус им рече пак: „Вистина, вистина ви велам: Јас Сум вратата на овците.

⁸Сите, кои дојдоа пред Мене, се крадци и разбојници; но овците не ги послушаа.

⁹Јас Сум вратата; кој ќе влезе низ Мене, ќе биде спасен, ќе влегува и ќе излегува и ќе најде пасиште.

¹⁰Крадецот влегува само да украде, да заколе и да погуби. Јас дојдов за да имаат живот и да го имаат изобилно.”

¹¹”Јас Сум Добриот Пастир. Добриот пастир го дава својот живот за овците.

¹²Наемникот, кој не е овчар, кому овците не му припаѓаат, го гледа волкот како доаѓа, ги остава овците и бега; а волкот ги разграбува и ги распрснува;

¹³зашто е наемник и не се грижи за овците.

¹⁴Јас Сум Добриот Пастир: и ги познавам Моите и Моите Ме познаваат Мене.

¹⁵Како што Татко Ми Ме познава Мене, и Јас Го познавам Мојот Татко; и Јас го давам Мојот живот за овците.

¹⁶И други овци имам, што не се од овој овчарник; и нив треба да ги доведам, па ќе го слушаат Мојот глас и ќе биде едно стадо и еден Пастир.

¹⁷Таткото Ме љуби затоа, што Јас го давам Својот живот, за да го земам пак.

¹⁸Никој не Ми го одзема, туку Јас го давам Сам од Себе. Имам власт да го дадам, и имам власт да го земам пак. Оваа заповед ја примив од Мојот Татко.”

¹⁹Заради тие зборови пак настана раздор меѓу Јудејците.

²⁰Мнозина од нив велеа: „Опфатен е од демон и безумствува, зошто Го слушате?”

²¹Други велеа: „Тоа не се зборови на опфатен од демон. Може ли демон да отвора очи на слепци?”

²²Тогаш во Ерусалим се празнуваше Посветување; беше зима.

²³А Исус одеше по Соломоновиот трем на Храмот.

²⁴Тогаш Јудејците Го опкружија и Му рекоа: „До кога ќе ни ја измачуваш душата? Ако си Ти Христос, кажи ни слободно!”

²⁵Исус им одговори: „Ви реков, и не верувате. Делата што Јас ги правам - во името на Мојот Татко - сведочат за Мене.

²⁶Но, вие не верувате, зашто не сте од Моите овци.

²⁷Моите овци го слушаат Мојот глас, и Јас ги познавам, и тие идат по Мене.

²⁸Јас им давам вечен живот и никако нема да загинат и никој нема да ги грабне од Мојата рака.

²⁹Мојот Татко - Кој ми ги даде - е поголем од сите, и никој не може да ги грабне од раката на Мојот Татко.

³⁰Јас и Татко Ми едно сме.”

³¹Јудејците пак донесоа камења, за да Го убијат со камења.

³²Исус им одговори: „Ви покажав многу добри дела од Мојот Татко; за кое од тие дела фрлате камења на Мене?”

³³Јудејците Му одговорија: „Не Те каменуваме заради добро дело, туку заради богохулство - зашто Ти, бидејќи човек, се правиш Бог.”

³⁴Исус им одговори: „Не е ли напишано во вашиот Закон: ‘Јас реков: богови сте?’

³⁵Ако ги наречува богови оние, на кои им беше упатено Божјото Слово - а Писмото не може да биде нарушено -

³⁶зошто вие Му велите дека хули на Бога Оној, Кого Таткото Го посвети и Го испрати во светот, - зашто реков: ‘Јас Сум Божји Син?’

³⁷Ако не ги правам делата на Мојот Татко, не верувајте Ми.

³⁸А ако ги вршам, верувајте им на делата, ако Мене не Ми верувате, за да сознаете и познаете дека Таткото е во Мене и Јас во Него!”

³⁹Тогаш сакаа пак да Го фатат, но им избега од рацете.

⁴⁰И пак отиде преку Јордан, каде што Јован крштаваше отпрвин, и остана таму.

⁴¹И мнозина дојдоа при Него и рекоа: „Јован не направи ниедно чудо, но сè што рече Јован за Него, беше вистина.”

⁴²И таму мнозина поверуваа во Него.