Read Библија, Константинов Јован 15 Bible Online

Јован 15 - Библија, Константинов bible

Јован 15

¹Јас Сум вистинската лоза и Мојот Татко е лозарот.

²Тој ја отстранува секоја прачка на Мене, што не дава плод; а ја чисти секоја, што дава плод, за да даде повеќе плод.

³Вие сте веќе чисти заради Словото, кое ви го зборував.

⁴Останете во Мене како Јас во вас. Како што прачката не може да роди плод сама од себе, ако не остане на лозата, така ни вие, ако не останете во Мене.

⁵Јас Сум лозата, а вие сте прачките. Кој останува во Мене, и Јас во него, тој дава многу плод; зашто без Мене не можете да направите ништо.

⁶Ако некој не остане во Мене, тој ќе биде исфрлен надвор како прачката, која е исушена, - ги собираат, ги фрлаат во оган и ги горат.

⁷Ако останете во Мене и ако Моите зборови останат во вас, барајте што и да посакате, и ќе ви биде.

⁸Мојот Татко се прославува со тоа, што ќе давате многу плод и ќе бидете Мои ученици.

⁹Како што Таткото Ме возљуби Мене, така и Јас ве возљубив вас. Останете во Мојата љубов!

¹⁰Ќе останете во Мојата љубов, ако ги запазите Моите заповеди, како што и Јас ги запазив заповедите на Мојот Татко и останувам во Неговата љубов.

¹¹Ова ви го реков за да биде Мојата радост во вас, и вашата радост да биде полна.

¹²Ова е Мојата заповед: да се љубите еден со друг, како што Јас ве љубев вас.

¹³Никој нема поголема љубов од оваа: да го положи сопствениот живот за своите пријатели.

¹⁴Вие сте Ми пријатели - ако го вршите она, што Јас го заповедам.

¹⁵Не ве наречувам веќе слуги; зашто слугата не знае што прави неговиот господар; а вас ве нареков пријатели, зашто ви соопштив сè што чув од Мојот Татко.

¹⁶Вие не Ме избравте Мене, но Јас ве избрав вас и ве поставив да одите и да принесувате плод, и вашиот плод да остане; и Мојот Татко да ви даде сè што ќе посакате во Мое име.

¹⁷Ова ви заповедам: да се љубите еден со друг!”

¹⁸”Ако светот ве мрази, знајте дека Мене Ме мразеше пред вас!

¹⁹Ако бевте од овој свет, светот би ги љубел своите; но бидејќи не сте од светов - туку Јас ве избрав од светот - затоа светот ве мрази.

²⁰Помнете го зборот што ви го реков: ‘Слугата не е поголем од својот господар!’ Ако Ме гонеа Мене, ќе ве гонат и вас; ако го пазеа Моето Слово, ќе го пазат и вашето.

²¹Туку, сè ова ќе ви го прават заради Моето име, зашто не Го познават Оној, Кој Ме пратил.

²²Да не дојдев и да не им зборував, немаше да имаат грев; но сега немаат изговор за својот грев.

²³Кој Ме мрази Мене, Го мрази и Мојот Татко.

²⁴Да не направев, меѓу нив дела какви никој друг не направил, немаше да имаат грев; но сега видоа и пак нè замразија Мене и Мојот Татко.

²⁵Туку, треба да се исполни словото, запишано во нивниот Закон: ‘Ме замразија без причина!’

²⁶”А кога ќе дојде Утешителот, Кого Јас ќе ви Го испратам од Таткото, Духот на Вистината, Кој излегува од Таткото, Тој ќе сведочи за Мене;

²⁷а и вие ќе сведочите, зашто сте со Мене од почетокот.”