Read Библија, Константинов Јован 3 Bible Online

Јован 3 - Библија, Константинов bible

Јован 3

¹А меѓу фарисеите имаше еден човек, по име Никодим, јудејски старешина.

²Тој дојде ноќе при Исуса и Му рече: „Рави! Знаеме дека си дојден од Бога како Учител; зашто никој не може да ги прави чудесата, што ги правиш Ти, ако Бог не е со него.”

³Исус му одговори и рече: „Вистина, вистина, ти велам, ако некој не се роди одозгора, тој не може да го види Божјото Царство.”

⁴Никодим Му рече: „Како може да се роди човек, кога е стар? Зар може по вторпат да влезе во утробата на мајка си и да се роди?”

⁵Исус му одговори: „Вистина, вистина, ти велам: ако некој не се роди од вода и Дух, тој не може да влезе во Божјото Царство.

⁶Роденото од тело, тело е; а роденото од Дух, дух е.

⁷Не чуди се што ти реков: треба да се родите одозгора.

⁸Ветерот дува каде што сака, и го слушаш неговиот шум, а не знаеш од каде доаѓа и каде оди. Така е со секој, кој е роден од Дух.”

⁹Никодим Му одговори и рече: „Како може да биде тоа?”

¹⁰Исус му одговори и рече: „Ти си Израелев учител, и не го знаеш ли тоа?

¹¹Вистина, вистина, ти велам: зборуваме за она, што знаеме; сведочиме за она што сме виделе; а сепак не го примате нашето сведоштво.

¹²Не верувате кога ви зборував за земните работи, како ќе верувате ако ви кажувам за небесните?

¹³И никој не отишол во небо, освен Оној, Кој слезе од небото, Човечкиот Син Кој е во небото.”

¹⁴И како што Мојсеј ја издигна змијата во пустината, така треба да биде издигнат Човечкиот Син,

¹⁵та секој, кој верува во Него да не загине, но да има вечен живот.

¹⁶Зашто Бог толку го возљуби светот, што Го даде Својот Единороден Син, та секој, кој верува во Него, да не загине, туку да има вечен живот.

¹⁷Зашто Бог не Го испрати Својот Син во светот за да му суди на светот, туку светот да се спаси преку Него.

¹⁸Кој верува во Него, нему не му се суди; а кој не верува веќе е осуден, зашто не поверувал во името на Единородниот Божји Син.

¹⁹Судот се состои во ова: Светлината дојде во светот, а луѓето ја засакаа темнината повеќе од светлината, зашто делата им беа зли.

²⁰Зашто, секој кој прави зло ја мрази светлината и не оди кон светлината, за да не бидат откриени неговите дела;

²¹а кој ја извршува вистината оди кон светлината, за да се видат неговите дела, бидејќи се извршени во Бога.

²²Потоа Исус дојде со Своите ученици во Јудеја; таму се задржа со нив и крштаваше.

²³Исто и Јован крштаваше во Енон, близу Салим, зашто таму имаше многу вода, и луѓето доаѓаа и се крштаваа;

²⁴зашто Јован уште не беше фрлен во темница.

²⁵Така настана препирка меѓу Јовановите ученици и еден Јудеец околу очистувањето.

²⁶И дојдоа при Јована и му рекоа: „Учителе, ене, Оној Кој беше со тебе на онаа страна на Јордан, за Кого ти сведочеше, Тој крштава, и сите одат при Него.”

²⁷Јован одговори и рече: „Не може човек ништо да земе, ако не му е дадено од небото.

²⁸Вие сами сте мои сведоци дека реков: „Јас не сум Христос, туку сум испратен пред Него.”

²⁹Кој има невеста, тој е младоженец. А пријателот на младоженецот, кој стои и го слуша, се радува многу штом ќе го чуе гласот на младоженецот. И така, оваа моја радост се исполни.

³⁰Тој треба да расте, а јас да се смалувам!”

³¹Кој доаѓа одозгора, над сите е; кој е од земјата, земен е и зборува земски. Кој доаѓа од небото над сите е;

³²тој сведочи за она што видел и чул, но никој не го прима Неговото сведоштво.

³³Кој го примил Неговото сведоштво, потврдува дека Бог е вистински.

³⁴Зашто Оној Кого Бог Го испратил говори Божји зборови; бидејќи, Бог не дава Дух со мерка.

³⁵Таткото Го љуби Синот и сè предаде во Неговата рака.

³⁶Кој верува во Синот, има вечен живот; а кој не се покорува на Синот, нема да види живот, туку Божијот гнев останува врз него.”