Read Библија, Константинов Јован 5 Bible Online

Јован 5 - Библија, Константинов bible

Јован 5

¹Потоа беше јудејски празник и Исус се искачи во Ерусалим.

²А во Ерусалим, при Овчата Врата, има бања со пет тремови, на еврејски наречена Витезда.

³Во нив лежеа мнозина болни; слепи, хроми и суви, (кои чекаа да се раздвижи водата.

⁴Зашто, ангел, одвреме на време, слегуваше во бањата и ја раздвижуваше водата, а кој прв ќе влезеше - откако ќе се разбрануваше водата - оздравуваше од каква и да било болест да страдаше.)

⁵Таму имаше еден човек, кој лежеше болен триесет и осум години.

⁶Кога Исус го виде како лежи и кога узна дека веќе долго боледува, му рече: „Сакаш ли да оздравиш?”

⁷Болниот Му одговори: „Господине, немам човек да ме спушти во бањата, кога ќе се разбранува водата; а додека дојдам јас, друг слегува пред мене.”

⁸Исус му рече: „Стани, подигни ја својата постела и оди!”

⁹И човекот оздраве веднаш, ја зеде својата постела и почна да оди. А тој ден беше сабота.

¹⁰Затоа Јудејците му рекоа на оздравениот човек: „Сабота е и не смееш да ја носиш постелата.”

¹¹Но тој им одговори: „Оној, Кој ме излечи ми рече: „Подигни ја својата постела и оди!”

¹²Тогаш го прашаа: „Кој е човекот кој ти рече: „Подигни ја својата постела и оди?”

¹³А исцелениот не знаеше Кој е, зашто Исус се отстрани, бидејќи имаше многу народ на тоа место.

¹⁴Потоа Исус го најде во Храмот и му рече: „Ете, оздраве, не греши повеќе, за да не те снајде нешто полошо.”

¹⁵Човекот отиде и им кажа на Јудејците дека Исус го излекува.

¹⁶И затоа Јудејците Го гонеа Исуса, и сакаа да Го убијат, дека тоа го направи во сабота.

¹⁷А Исус им одговори: „Мојот Татко работи постојано, па и Јас работам.”

¹⁸Затоа Јудејците Го бараа уште повеќе да Го убијат, не само дека ја нарушуваше саботата, туку дека и Бога Го наречуваше Свој Татко, изедначувајќи се со Бога.

¹⁹А Исус пак во одговор им рече: „Вистина, вистина ви велам, Синот не може ништо да прави Сам од Себе, ако не види што прави Таткото; зашто она што го прави Таткото истото го прави и Синот.

²⁰Зашто Таткото Го љуби Својот Син и Му покажува сè што прави Сам и ќе Му покаже дела уште поголеми од овие, за да се чудите.

²¹Зашто, како што Таткото воскреснува мртви и ги оживува, така и Синот ги оживува оние, кои што сака.

²²Таткото не суди никого, туку целиот суд Му го даде на Синот,

²³за сите да Го почитуваат Синот, како што Го почитуваат Таткото. Кој не Го почитува Синот - не Го почитува ни Таткото, Кој Го пратил.

²⁴Вистина, вистина ви велам: кој го слуша Моето слово и верува во Оној, Кој Ме прати, има вечен живот и не доаѓа на суд, туку преминал од смртта во живот.

²⁵Вистина, вистина ви велам дека доаѓа час - и веќе е тука - кога мртвите ќе го чујат гласот на Божјиот Син, и кои ќе го чујат, ќе живеат.

²⁶Зашто како што Таткото има живот во Себе, така Му даде и на Синот да има живот во Себе.

²⁷Му ја даде и власта да суди, зашто е Човечки Син.

²⁸Не чудете се на тоа, зашто доаѓа час во кој сите, кои се во гробовите, ќе го чујат Неговиот глас

²⁹и ќе излезат од нив, кои правеле добро, ќе воскреснат за живот; а кои правеле зло, ќе воскреснат за осудување.

³⁰Јас ништо не можам да правам Сам од Себе; како што слушам, така судам, и Мојот суд е праведен, зашто не ја барам Мојата волја, туку волјата на Оној, Кој Ме прати.

³¹Ако Јас сведочам Сам за Себе, Моето сведоштво нема да биде вистинско.

³²Има Друг Кој сведочи за Мене и знам дека е вистинско сведоштвото што го дава за Мене.

³³Вие пративте при Јована, и тој посведочи за вистината;

³⁴но јас не примам сведоштво од човек, туку го кажувам ова, за да се спасите вие.

³⁵Тој беше светило, што гореше и светеше, но вие сакавте да се радувате малку време на неговата светлина.

³⁶Јас пак имам сведоштво поголемо од Јовановото: делата што Таткото Ми ги даде да ги завршам, токму тие дела, што ги правам, сведочат за Мене - дека Таткото Ме пратил.

³⁷И Таткото, Кој Ме прати, Самиот сведочи за Мене. Вие ни го чувте некогаш Неговиот глас, ниту го видовте Неговото лице,

³⁸и Неговите зборови ги немате постојано во вас, зашто не Му верувате на Оној, Кого Тој Го пратил.

³⁹Вие ги проучувате Писмата, зашто мислите дека имате вечен живот во нив; и тие сведочат за Мене.

⁴⁰Но вие не сакате да дојдете при Мене, за да имате живот.

⁴¹Слава не примам од луѓе,

⁴²но знам дека вие немате во себеси Божјата љубов.

⁴³Јас дојдов во името на Мојот Татко, и не Ме примате. Ако дојде друг во свое име, него ќе го примите.

⁴⁴Како можете да верувате, кога примате слава еден од друг, а не ја барате славата, што доаѓа од Единиот Бог?

⁴⁵Не мислете дека Јас ќе ве обвинам пред Таткото; има кој ве обвинува - Мојсеј, на кого се надевате.

⁴⁶Зашто, ако му верувавте на Мојсеја, ќе Ми верувавте и Мене; зашто тој пишуваше за Мене.

⁴⁷Но ако не им верувате на неговите Писма, како ќе им верувате на Моите зборови?”