Read Библија, Константинов Јован 7 Bible Online

Јован 7 - Библија, Константинов bible

Јован 7

¹Потоа Исус одеше по Галилеја; бидејќи не сакаше да оди по Јудеја, зашто Јудејците Го бараа да Го убијат.

²А наближуваше јудејскиот празник на Сениците.

³Тогаш Неговите браќа Му рекоа: „Замини оттука и оди во Јудеја, та и Твоите ученици да ги видат делата, што ги вршиш;

⁴зашто никој не прави нешто тајно, кога самиот сака да биде познат. Штом ги вршиш тие дела, јави му се на светот.”

⁵Зашто ни Неговите браќа не веруваа во Него.

⁶Затоа Исус им рече: „Моето време уште не дошло, а вашето време секогаш е подготвено.

⁷Светот не може да ве мрази вас; а Мене Ме мрази, зашто сведочам за него дека неговите дела се зли.

⁸Вие отидете горе на празникот; Јас не одам на празников, зашто Моето време уште не се исполнило.”

⁹Тоа им го рече и остана во Галилеја.

¹⁰А кога Неговите браќа отидоа на празникот, тогаш отиде и Самиот, не јавно, туку тајно.

¹¹Но Јудејците Го бараа на празникот и зборуваа: „Каде е Оној?”

¹²И многу се зборуваше за Него во народот; едни зборуваа: „Добар е!” а други велеа: „Не, туку го заблудува народот.”

¹³Меѓутоа, никој не зборуваше слободно за Него, заради стравот од Јудејците.

¹⁴А кога празникот веќе се преполови, Исус отиде во Храмот и поучуваше.

¹⁵Затоа Јудејците се чудеа и велеа: „Како ги познава Овој Писмата - кога не учел?”

¹⁶Тогаш Исус им одговори и рече: „Мојата наука не е Моја, туку на Оној Кој Ме пратил.

¹⁷Ако некој сака да ја исполнува Неговата волја, ќе знае дали е наукава од Бога, или зборувам Сам од Себе.

¹⁸Кој говори сам од себе - ја бара својата слава; а кој ја бара славата на Оној Кој Го пратил - Тој е вистински; во Него нема неправда.

¹⁹Зар Мојсеј не ви даде Закон? Но, никој од вас не го исполнува Законот. Зошто сакате да Ме убиете?”

²⁰Народот одговори: „Бес е во Тебе; кој сака да Те убие?”

²¹Исус во одговор им рече: „Направив едно дело и сите се чудите.

²²Затоа Мојсеј ви го даде обрезанието - не како тоа да е од Мојсеја, туку од татковците, па вие во сабота обрезувате човек.

²³Ако човек се обрезува во сабота - за да не се наруши Мојсеевиот Закон - зошто се лутите на Мене дека исцелив цел човек во сабота?

²⁴Не судете по надворешниот изглед, туку судете праведно!”

²⁵Тогаш некои од ерусалимците рекоа: „Не е ли Овој Човекот, Кого Го бараат да Го убијат?

²⁶А ете, зборува слободно и ништо не Му велат. Да не се увериле старешините, дека Тој е навистина Христос?

²⁷Но, Овој Го знаеме од каде е, а кога ќе дојде Христос, никој не ќе знае од каде е.”

²⁸Исус пак, поучувајќи во Храмот, извика и рече: „И Мене Ме познавате, а знаете и од каде Сум; не дојдов Сам од Себе, туку е вистински Оној, Кој Ме пратил, Кого вие не Го познавате.

²⁹Јас Го знам, зашто Сум од Него и Тој Ме прати.”

³⁰Тогаш сакаа да Го фатат, но никој не стави рака врз Него, зашто уште не беше дошол Неговиот час.

³¹А мнозина од народот поверуваа во Него и велеа: „Кога ќе дојде Христос, дали ќе направи повеќе чуда, отколку што направи Овој?”

³²Фарисеите чуја дека народот зборува така за Него, па првосвештениците и фарисеите испратија служители да Го фатат.

³³Тогаш Исус рече: „Уште малку време Сум со вас, потоа заминувам кај Оној, Кој Ме пратил.

³⁴Ќе Ме барате и нема да Ме најдете, и каде Сум Јас, вие не можете да дојдете.”

³⁵Тогаш Јудејците си рекоа меѓу себе: „Каде ќе оди Овој, па да не можеме да Го најдеме? Да не сака да оди при расеаните меѓу Грците и да ги поучува Грците?

³⁶Што значи зборот, што го рече: ‘Ќе Ме барате и нема да Ме најдете;’ и: ‘каде Сум Јас, вие не можете да дојдете?’

³⁷А во последниот, големиот ден на празникот Исус застана и извика, велејќи: „Ако е некој жеден, нека дојде при Мене и нека пие.

³⁸Кој верува во Мене - како што е кажано во Писмото - „од неговата внатрешност ќе потечат реки на жива вода.”

³⁹Тоа го рече пак за Духот, Кого ќе Го примат оние, кои веруваат во Него; зашто Духот уште не беше слезен, зашто Исус уште не беше прославен.

⁴⁰А некои од народот, кои ги чуја тие зборови, рекоа: „Овој е навистина Пророкот.

⁴¹Други велеа: „Овој е Христос.” Трети пак прашуваа: „Зар Христос ќе дојде од Галилеја?

⁴²Зар Писмото не рече дека Христос ќе дојде од Давидовото семе, и од гратчето Витлеем, каде беше Давид?”

⁴³Така настана раздор во народот заради Него.

⁴⁴А некои од нив сакаа да Го фатат, но никој не стави рака врз Него.

⁴⁵Кога слугите дојдоа при првосвештениците и фарисеите, тие им рекоа: „Зошто не Го доведовте?”

⁴⁶Служителите одговорија: „Никој никогаш не зборувал така, како што говори Овој Човек.”

⁴⁷А фарисеите им одговорија: „Зар сте и вие заблудени?

⁴⁸Дали некој од првенците или од фарисеите поверувал во Него?

⁴⁹Туку, проклет е овој народ, што не го знае Законот.”

⁵⁰Никодим, кој порано отиде при Исуса, а кој беше од нив, им рече:

⁵¹”Осудува ли нашиот Закон некого, ако најнапред не го сослуша и не разбере што прави?”

⁵²Тие во одговор му рекоа: „Да не си и ти од Галилеја? Испитај и види дека пророк не доаѓа од Галилеја.”

⁵³И секој си отиде во својот дом.