Read Библија, Константинов Јован 8 Bible Online

Јован 8 - Библија, Константинов bible

Јован 8

¹Исус отиде на Маслиновата Гора.

²А рано наутро пак дојде во Храмот; и сиот народ доаѓаше при Него. Тој седна и ги поучуваше.

³Тогаш книжниците и фарисеите доведоа една жена, фатена во прељуба, откако ја поставија насредина,

⁴Му рекоа: „Учителе, женава е фатена во самото дело на прељуба.

⁵А Мојсеј ни нареди во Законот да ги убиваме со камења таквите; а Ти што велиш?”

⁶Тоа го рекоа за да Го искушаат, за да имаат за што да Го обвинат. А Исус се наведна и пишуваше со прстот по земјата.

⁷Но бидејќи и натаму Го прашуваа, се исправи и им рече: „Кој е од вас безгрешен, нека прв фрли камен врз неа!”

⁸И пак се наведна и пишуваше по земјата.

⁹А тие, кога го чуја тоа, бидејќи совеста ги убеди, излегуваа еден по еден, почнувајќи од најстарите до последните. И Исус остана Сам со жената, која стоеше насреде.

¹⁰Исус се исправи и и рече: „Жено, каде се? Ниеден ли не те осуди?”

¹¹Таа одговори: „Ниеден, Господи.” Исус рече: „Ни Јас не те осудувам, оди си и отсега не греши веќе.”

¹²Исус пак прозбори натаму, велејќи: „Јас Сум Светлината на светот; кој Ме следи, нема да оди во темнина, туку ќе ја има Светлината на Животот.”

¹³Затоа фарисеите Му рекоа: „Ти сведочиш Сам за Себе Твоето сведоштво не е вистинско.”

¹⁴Исус во одговор им рече: „Иако сведочам Сам за Себе, Моето сведоштво е вистинско, зашто знам од каде дојдов и каде одам, а вие не знаете од каде дојдов и каде одам.

¹⁵Вие судите според телото; Јас не му судам никому.

¹⁶И ако и судам Мојот суд е вистински, зашто не Сум Сам, туку - Јас и Мојот Татко, Кој Ме прати.

¹⁷И во вашиот закон пишува дека сведоштвото на двајца луѓе е вистинско.

¹⁸Јас сведочам за Себе и Мојот Татко, Кој Ме прати, сведочи за Мене.”

¹⁹Тогаш Му рекоа: „Каде е Твојот Татко?” Исус одговори: „Не Ме познавате ни Мене ни Мојот Татко; ако Ме познававте Мене, ќе Го познававте и Мојот Татко.”

²⁰Овие зборови ги кажа, при ризницата, кога поучуваше во Храмот; и никој не Го фати, зашто уште не беше дошол Неговиот час.

²¹И Исус им рече пак: „Јас си одам и ќе Ме барате, и ќе умрете во својот грев. Каде одам Јас - вие не можете да дојдете.”

²²Затоа Јудејците рекоа: „Да не се самоубие, зашто вели: ‘Каде одам Јас - вие не можете да дојдете?’”

²³Им рече уште: „Вие сте од долу, Јас Сум одозгора; вие сте од светов, Јас не Сум од светов.

²⁴Затоа ви реков дека ќе умрете во своите гревови; зашто ако не поверувате дека Сум Јас, ќе умрете во своите гревови.”

²⁵Тогаш Го прашаа: „Кој си Ти?” Исус им рече: „Имено тоа, кое ви зборувам од почетокот.

²⁶Имам многу да зборувам и да судам за вас; но вистински е Оној, Кој Ме испрати, и Јас му го кажувам на светот, она, што сум го чул од Него.”

²⁷Не сфатија дека им зборува за Таткото.

²⁸Затоа Исус им рече: „Кога ќе Го издигнете Човечкиот Син, тогаш ќе сознаете дека тоа Сум Јас и дека ништо не правам Сам од Себе, туку дека зборувам она што Татко Ми Ме научи.

²⁹Оној, Кој ме прати, е со Мене; не Ме остави Сам, зашто секогаш го вршам она што Му е угодно.”

³⁰Кога го зборуваше тоа, мнозина поверуваа во Него.

³¹Затоа Исус им рече на Јудејците, кои Му поверуваа: „Ако пребивате во Моето слово, навистина сте Мои ученици;

³²и ќе ја познаете вистината, и вистината ќе ве ослободи.”

³³Му одговорија: „Ние сме Авраамово потомство и никогаш никому не сме му робувале; како велиш Ти: ‘Ќе бидете слободни?’

³⁴Исус им одговори: „Вистина, вистина ви велам, дека секој кој прави грев, роб му е на гревот.

³⁵А робот не останува дома довека; Синот останува довека.

³⁶И така, ако Синот ве ослободи, навистина ќе бидете слободни.

³⁷Знам дека сте Авраамово потомство; но пак барате да Ме убиете, зашто Моето слово нема место во вас.

³⁸Јас го зборувам тоа што сум го видел кај Татко Ми. Исто и вие правите што сте чуле од вашиот татко.”

³⁹Му одговорија и рекоа: „Наш татко е Авраам.” Исус им рече: „Ако бевте Авраамови чеда, ќе ги вршевте Авраамовите дела.

⁴⁰А сега сакате да Ме убиете Мене, Човекот, Кој ви ја кажа вистината, што ја чув од Бога. Авраам не направи така.

⁴¹Вие ги вршите делата на татка си.” Ние не сме родени од блудство; имаме еден Татко - Бог.”

⁴²Исус им рече: „Ако Бог беше ваш Татко, ќе Ме љубевте Мене; зашто Јас од Бога излегов и дојдов; и не дојдов Сам од Себе, туку Тој Ме прати.

⁴³Зошто не го разбирате Моето зборување? Затоа што не можете да ја слушате Мојата наука.

⁴⁴Вие потекнувате од вашиот татко - ѓаволот, и сакате да ги исполнувате желбите на татка си. Тој беше човекоубиец од почеток и не остана во вистината, зашто нема вистина во него. Кога зборува лага, зборува од своето, зашто е лажец и татко на лагата.

⁴⁵Не Ми верувате Мене, зашто ви ја зборувам вистината.

⁴⁶Кој од вас Ме обвинува за грев? Ако ја зборувам вистината, зошто не Ми верувате?

⁴⁷Кој е од Бога, ги слуша Божјите зборови; затоа вие не ги слушате, зашто не сте од Бога.”

⁴⁸Јудејците Му одговорија и рекоа: „Не зборуваме ли ние право, дека Ти си Самарјанец и дека имаш бес?”

⁴⁹Исус одговори: „Јас немам бес, туку Го почитувам Мојот Татко, а вие Ме срамите.

⁵⁰Јас не ја барам Мојата Слава; има Кој бара и суди.

⁵¹Вистина, вистина ви велам, ако некој го запази Моето слово, нема да види смрт довека.”

⁵²Јудејците Му рекоа: „Сега знаеме, дека имаш нечист дух во Тебе. Авраам почина, и пророците исто, а Ти велиш: ‘Ако некој го запази Моето слово, нема да ја вкуси смртта довека.’

⁵³Зар си Ти поголем од нашиот татко Авраам - кој умре? И пророците умреа. За кого се претставуваш Ти Самиот?”

⁵⁴Исус одговори: „Ако Јас се прославувам Самиот Себе, Мојата слава е ништо; Мене Ме слави Мојот Татко, за Кого вие велите дека е ваш Бог.

⁵⁵Вие не Го запознавте, а Јас Го познавам. И ако речам дека не Го познавам, ќе бидам лажец како и вас; но Јас Го познавам и го пазам Неговото слово.

⁵⁶Авраам, вашиот татко, се радуваше да го види Мојот ден, и го виде и се зарадува.”

⁵⁷Јудејците Му рекоа: „Уште немаш педесет години, и Авраама си го видел?”

⁵⁸Исус им рече: „Вистина, вистина ви велам: Јас Сум, пред да се родил Авраам.”

⁵⁹Тогаш кренаа камења, за да ги фрлат на Него; но Исус се скри и излезе од Храмот.