Read Библија, Константинов Дела Ап. 10 Bible Online

Дела Ап. 10 - Библија, Константинов bible

Дела Ап. 10

¹Во Ќесарија беше некој човек, по име Корнелиј, стотник во таканаречениот Италиски полк;

²беше побожен и богобојазлив со сиот свој дом; кој му даваше многу милостини на народот и Му се молеше на Бога постојано.

³Околу деветтиот час на денот, виде јасно во видение Божји ангел, како доаѓа при него и му рече: „Корнелиј!”

⁴А тој погледна во него и исплашен рече: „Што е, Господи?” Му рече: „Твоите молитви и твоите милостини се воздигнаа до Бога и Тој си спомнува за нив.

⁵И сега, испрати луѓе во Јопија и повикај некој Симон, кој се вика Петар.

⁶Тој му е гостин на некој Симон, кожар, чија куќа е покрај морето; тој ќе ти каже што треба да направиш.”

⁷И кога си отиде ангелот, кој му зборуваше, повика двајца свои слуги и еден побожен војник, од оние, кои беа постојано покрај него,

⁸и им кажа сè и ги испрати во Јопија.

⁹А утреден, додека тие патуваа и наближуваа до градот, Петар излезе околу шестиот час, се качи на покривот на куќата, да се помоли.

¹⁰Огладне и посака да јаде; и додека му приготвуваа јадење, тој имаше видение:

¹¹и виде отворено небо и некаков сад како големо платно да слегува и се спушта со своите четири краишта на земјата.

¹²Во него беа сите четвороножни животни, и земни лазачи, и небесни птици.

¹³И еден глас му рече: „Стани, Петре, заколи и јади!”

¹⁴А Петар рече: „Никако, Господи, зашто уште никогаш не сум јал нешто погано и нечисто!”

¹⁵И гласот повторно му се јави: „Она што Бог го очистил, ти не наречувај го погано!”

¹⁶И тоа се случи трипати, и садот веднаш беше земен на небо.

¹⁷И додека Петар беше во недоумение во себе, што би можело да значи видението, што го виде; ете, луѓето испратени од Корнелиј, откако се распрашаа за Симоновата куќа, застанаа пред вратата,

¹⁸и прашаа: „Дали е тука на гости Симон, наречен Петар?”

¹⁹И додека Петар уште размислуваше за видението, Духот му рече: „Еве, те бараат тројца мажи;

²⁰туку стани, слези и оди со нив не размислувајќи, зашто Јас ги пратив!”

²¹Тогаш Петар слезе при луѓето, испратени од Корнелиј при него и рече: „Еве, јас сум оној, кого го барате. Зошто дојдовте?”

²²А тие рекоа: „Стотникот Корнелиј - маж праведен и богобојазлив, посведочен од целиот јудејски народ, прими заповед од свет ангел да те повика во својот дом и да чуе зборови од тебе.”

²³Тогаш ги повика внатре и ги нагости. А утреден стана и отиде со нив, и некои браќа од Јопија отидоа со него.

²⁴На другиот ден влегоа во Ќесарија, а Корнелиј ги чекаше, откако ги повика своите роднини и блиските пријатели.

²⁵А кога Петар влегуваше, Корнелиј му излезе во пресрет, падна пред неговите нозе и се поклони.

²⁶А Петар го подигна, велејќи: „Стани! И јас сум само човек!”

²⁷И разговарајќи со него, влезе и најде мнозина собрани.

²⁸И им рече: „Вие знаете дека на Јудеец не му прилега да се дружи со човек од друг род и да доаѓа при него. Но, мене Бог ми покажа никого да не наречувам поган или нечист.

²⁹Затоа дојдов без приговор, кога ме повикавте. Затоа прашувам - по која причина ме повикавте?”

³⁰И Корнелиј рече: „Пред четири дена, во овој час, во деветтиот час, се молев во својот дом;

³¹и ете, пред мене застана човек во светла облека и рече: ‘Корнелиј, послушана е твојата молитва и Бог си спомна за твоите милостини.

³²И така, испрати некого во Јопија и повикај го Симона, кој се вика Петар! Тој е гостин во куќата на Симона, кожарот, покрај морето; кога тој ќе дојде ќе ти зборува.’

³³И веднаш пратив при тебе, и ти направи добро што дојде. Сега тука, сите сме пред Бога, за да чуеме сè што Господ ти заповедал.”

³⁴Тогаш Петар ја отвори устата и рече: „ Вистина гледам дека Бог не гледа на лице,

³⁵туку Нему Му е мил во секој народ оној, кој се бои од Него и кој прави правда.

³⁶Вие го знаете Словото што им го испрати на Израелевите синови, објавувајќи го Евангелието на мирот преку Исуса Христа; Овој е Господ на сите.

³⁷Вие знаете што се случи по сета Јудеја, почнувајќи од Галилеја, по крштавањето што го проповедаше Јован;

³⁸Го знаете Исуса од Назарет, како Бог Го помаза со Светиот Дух и со сила, Кој помина правејќи добрини и оздравувајќи ги сите, кои ѓаволот ги измачуваше, зашто Бог беше со Него.

³⁹И ние сме сведоци за сè што направи во Јудејската Земја и во Ерусалим; Него Го убија обесувајќи Го на дрво.

⁴⁰Него Бог Го воскресна на третиот ден и Му даде да се јави,

⁴¹но не на сите луѓе, а на однапред од Бога избраните сведоци - нам, кои јадевме и пиевме со Него по Неговото воскресение од мртвите.

⁴²И Тој ни заповеда да му проповедаме на народот и да сведочиме дека Тој е од Бога определениот Судија на живите и мртвите.

⁴³Сите пророци сведочат за Него, дека секој кој верува во Него, ќе добие преку Неговото име опростување на гревовите.”

⁴⁴Додека Петар уште ги зборуваше тие зборови, Светиот Дух слезе на сите, кои го слушаа словото;

⁴⁵и се зачудија обрезаните верници, кои дојдоа со Петра, дека и на народите се излеа дарот на Светиот Дух;

⁴⁶зашто ги чуја како зборуваат јазици и Го величаат Бога. Тогаш Петар рече:

⁴⁷”Може ли некој да им ја забрани водата, да не се крстат овие, кои Го примија Светиот Дух како и ние?”

⁴⁸И заповеда да ги крстат во името на Исуса Христа. Тогаш го замолија да остане уште неколку денови.