Read Библија, Константинов Римјаните 10 Bible Online

Римјаните 10 - Библија, Константинов bible

Римјаните 10

¹Браќа, желбата на моето срце и мојата молитва кон Бога за нив е: да се спасат.

²Зашто, сведочам за нив, дека имаат ревност за Бога, но без правилно знаење.

³Имено, не знаејќи, што е Божјата правда и сакајќи да ја воспостават својата сопствена, не и се покорија на Божјата правда.

⁴Зашто Христос е свршетокот на Законот, за правда на секој, кој верува.

⁵Зашто, Мојсеј пишува за праведноста, која е од Законот: „Човекот, кој ја исполнува, ќе живее од неа.”

⁶А праведноста, која е од верата, зборува вака: „Да не речеш во своето срце: „Кој ќе се искачи на небото?” односно, да Го симне Христа;

⁷или: „Кој ќе слезе во бездната?” односно, да Го изведе Христа од мртвите!

⁸Но што зборува таа: „Словото е близу до тебе, во твојата уста и во твоето срце,” односно, словото на верата, која ја проповедаме.

⁹Зашто, ако со твојата уста исповедаш, дека Исус е Господ и ако во твоето срце поверуваш, дека Бог Го воскреснал од мртвите, ќе бидеш спасен.

¹⁰Зашто со срцето се верува за праведност, а со устата се исповедува за спасение,

¹¹зашто Писмото вели: „Секој, кој верува во Него, нема да се засрами.”

¹²Но нема разлика меѓу Јудеец и Грк; зашто еден и ист е Господ на сите; богат за сите, кои Го повикуваат,

¹³зашто: „Секој, кој ќе го повика Господовото име, ќе се спаси.”

¹⁴Но, како ќе Го повикаат Оној, во Кого не поверувале? А како ќе поверуваат во Оној, за Кого не чуле? А како ќе чујат без проповедник?

¹⁵И како ќе проповедаат, ако не се испратени, како што е напишано: „Колку се прекрасни нозете на оние, што проповедаат мир, кои го навестуваат доброто!”

¹⁶Но сите не го послушаа Евангелието, зашто Исаија вели: „Господи, кој и поверувал на нашата проповед?”

¹⁷И така, верата доаѓа од слушањето, а слушањето од Христовото слово.

¹⁸Но велам: „Зар тие не слушнаа?” Напротив: „Гласот им излезе по целата земја, и нивните зборови до крајот на светот.”

¹⁹Пак прашувам: „Зар Израел не разбра? Мојсеј прв рече: „Јас ќе предизвикам ревност во вас - преку оние, што не се народ и ќе разбудам во вас гнев, против еден неразумен народ.”

²⁰А Исаија пак се осмелува да рече: „Ме најдоа оние, кои не Ме бараа, и им се јавив на оние, кои не прашуваа за Мене.”

²¹А за Израел говори: „Цел ден ги протегав Своите раце кон народ непослушен и противречлив.”