Read Библија, Константинов Римјаните 2 Bible Online

Римјаните 2 - Библија, Константинов bible

Римјаните 2

¹Затоа немаш изговор човеку, кој судиш - кој и да си ти - зашто судејќи го другиот, самиот се осудуваш; бидејќи ти кој судиш, го правиш истото.

²А знаеме дека Божјиот суд е според вистината врз тие, кои прават такви работи.

³Мислиш ли, о човеку, кој им судиш на оние, кои прават такви работи, а истото го правиш, дека ќе го избегнеш Божјиот суд?

⁴Или ги презираш: богатството на Неговата благост, кротоста и долготрпеливоста, а не знаеш дека Божјата добрина те води кон покајание?

⁵Но со твојата закоравеност и со непокајаното срце самиот собираш гнев врз себе, за денот на гневот и на откривањето на праведниот Божји суд,

⁶Кој ќе му даде секому според неговите дела:

⁷на оние, кои со трпение прават добро и бараат слава, чест и непропадливост - вечен живот;

⁸а на оние, кои се противаат и не и се покоруваат на вистината, а се покоруваат на неправдата - гнев и јарост.

⁹Неволја и мака на секоја човечка душа, која прави зло; а најпрвин на Јудеец, па и на Грк!

¹⁰А слава, чест и мир за секого, кој прави добро; а најпрвин на Јудеец, па и на Грк!

¹¹Зашто Бог не гледа на лице.

¹²Зашто, кои згрешиле без Закон, без Закон и ќе загинат; а сите кои згрешиле под Закон, според Законот ќе бидат осудени.

¹³Бидејќи, пред Бога не се праведни оние, кои само го слушаат Законот, а ќе бидат оправдани оние, кои се извршители на Законот.

¹⁴Зашто кога народите, кои немаат Закон, го исполнуваат - по природа - она што Законот го бара; тогаш тие се, немајќи Закон, сами за себе закон.

¹⁵Тие покажуваат дека делото на Законот е напишано во нивните срца, за што сведочат: нивната совест и нивните мисли, што меѓусебно се обвинуваат или се бранат,

¹⁶во Денот, кога Бог преку Исуса Христа, според моето Евангелие, ќе ги суди човечките тајни.

¹⁷Ако ти, кој се наречуваш Јудеец, се потпираш на Законот и се фалиш со Бога,

¹⁸ја знаеш Неговата волја и, поучен од Законот, знаеш да го избереш подоброто;

¹⁹и си уверен дека си водач на слепци, светлина на оние, кои се во темнина,

²⁰воспитач на неразумните, учител на младите, зашто имаш во Законот олицетворување на знаењето и вистината;

²¹и така, ти, кој го учиш другиот, не ли се учиш самиот себе? Ти, кој проповедаш да не се краде, крадеш ли?

²²Ти, кој зборуваш да не се прави прељуба, не вршиш ли прељуба? Ти, кој се гнасиш од идолите, ги ограбуваш ли нивните храмови?

²³Ти, кој се фалиш со Законот, Го обесчестуваш ли Бога со престапување на Законот?

²⁴”Па заради вас се хули Божјото име меѓу народите” - како што е напишано.

²⁵Секако, обрезанието е полезно, ако го исполнуваш Законот; но ако си престапник на Законот, твоето обрезание станува необрезание.

²⁶И така, ако необрезаниот ги пази прописите на Законот, нема ли неговото необрезание да му биде сметано како обрезание?

²⁷И така, оној, кој не е телесно обрезан, а го исполнува Законот, ќе ти суди тебе, кој си престапник на Законот - и покрај тоа што го имаш словото на Законот и обрезанието.

²⁸Зашто не е Јудеец оној, кој е тоа надворешно, ниту е вистинско обрезание она, што е надворешно - врз телото -

²⁹туку Јудеец е оној, кој е тоа во внатрешноста; а вистинското обрезание на срцето е по Дух, а не по буква. Неговата пофалба не е од луѓето, а од Бога.