Read Библија, Константинов Римјаните 3 Bible Online

Римјаните 3 - Библија, Константинов bible

Римјаните 3

¹И така, каква предност има Јудеецот? Или: каква е ползата од обрезанието?

²Голема, во секој однос. Прво: ним им се доверени Божјите слова.

³Па што! Ако некои беа неверни, зар нивната неверност ќе ја уништи Божјата верност?

⁴Далеку од тоа! Но, Бог нека е вистинит, а секој човек лажец, како што е напишано: „Да бидеш оправдан во своите зборови и да победиш кога се судиш.”

⁵Ако нашата неправда ја покажува Божјата правда, што ќе речеме? Дали е Бог неправеден, кога се гневи? (човечки зборувам).

⁶Далеку од тоа! Како Бог би можел тогаш да му суди на светот?

⁷Зашто, ако преку мојата лага се покаже уште повозвишена Божјата вистина за Неговата слава, зошто ми се суди уште како на грешник?

⁸”Зошто да не правиме зло, за да дојде добро?” - како што нè клеветат некои и велат за нас, дека ние зборуваме така? Осудувањето на таквите е праведно.

⁹Што тогаш! Дали имаме предност? Никако, зашто веќе ги обвинуваме Јудејците и Грците, дека се сите под грев,

¹⁰како што е напишано: „Нема никој праведен, нема ниту еден;

¹¹нема разумен, нема кој да Го бара Бога;

¹²сите застранија, сите заедно станаа неполезни, нема кој да прави добро, нема ниту еден.”

¹³Нивното грло е отворен гроб, измамуваат со јазиците; змиски отров е под нивните усни.

¹⁴Устата им е полна со клевета и горчина.

¹⁵Нозете им се брзи за пролевање крв;

¹⁶запустување и беда се по нивните патишта;

¹⁷тие не го познаваат патот на мирот.

¹⁸Нема Божји страв пред нивните очи.”

¹⁹А знаеме дека сè што вели Законот, им го зборува на оние, кои се под Законот, за да занеми секоја уста и за да биде целиот свет виновен пред Бога,

²⁰зашто со делата на Законот ниедно тело нема да се оправда пред Него; зашто преку Законот доаѓа самото познавање на гревот.

²¹А сега, независно од Законот, се јави Божјата правда, за која сведочат Законот и пророците,

²²и тоа Божјата правда, преку верата во Исуса Христа, за сите кои веруваат, бидејќи нема разлика;

²³зашто сите згрешија и им недостасува Божјата слава,

²⁴но се оправдуваат од Неговата благодат, преку откупот во Христа Исуса,

²⁵Кого Бог Го постави за жртва на помирувањето преку вера, во Неговата крв, за да се покаже Неговата правда во пропуштањето на поранешните гревови, во времето на Божјото долготрпение;

²⁶та да ја покаже Својата правда во сегашно време, за да биде Самиот праведен и за да го оправда оној, кој е од верата на Исуса.

²⁷И така, каде е фалењето? Исклучено е. Според кој закон? Според законот на делата ли? Не, туку според законот на верата.

²⁸И така, ние заклучуваме дека човекот се оправдува преку верата, без делата на Законот.

²⁹Или Бог е само на Јудејците, а не и на народите? Да, и на народите,

³⁰зашто е само еден Бог, Кој ќе ги оправда обрезаните по вера и необрезаните преку вера.

³¹Според тоа, дали го укинуваме Законот преку верата? Далеку од тоа! Туку, со тоа го утврдуваме Законот.