Read Библија, Константинов Римјаните 4 Bible Online

Римјаните 4 - Библија, Константинов bible

Римјаните 4

¹И така, што ќе речеме дека нашиот прататко Авраам добил по тело?

²Зашто, ако е Авраам оправдан врз основа на своите дела, може да се фали, но не пред Бога!

³Но, што вели Писмото: „Авраам Му поверува на Бога и тоа му се засмета за праведност.”

⁴А на оној, кој работи, платата не му се засметува по милост, туку по долг;

⁵додека на оној, кој не работи, а верува во Оној, Кој го оправдува безбожникот, неговата вера му се засметува за праведност,

⁶така и Давид го наречува блажен човекот, кому Бог му ја засметува праведноста без дела:

⁷”Блажени се оние, чии беззаконија се простени и чии гревови се покриени!

⁸”Блажен е човекот, кому Господ не му засметува грев!”

⁹Дали блаженството се однесува само за обрезаните, или и за необрезаните? Зашто ние велиме: „На Авраама верата му се засмета за праведност.”

¹⁰Па како му се засмета? Кога беше обрезан или кога беше необрезан? Не кога беше обрезан, туку кога беше необрезан.

¹¹И го прими знакот на обрезанието како печат на праведноста, што ја доби преку верата како необрезан, за да им биде татко на сите, кои веруваат како необрезани; за да им се засмета и ним тоа во праведност,

¹²и да им биде татко и на обрезаните, но не на оние, кои се само обрезани, туку кои и одат по стапките на верата на нашиот татко Авраам, која ја имаше додека уште беше необрезан.

¹³Зашто, ветувањето на Авраама, или на неговото потомство, дека ќе биде наследник на светот, не дојде преку Законот, туку преку праведноста од верата.

¹⁴Имено, ако се наследници само оние од Законот, тогаш верата е без значење; и ветувањето е поништено.

¹⁵Зашто Законот донесува гнев; а каде нема Закон нема ни престапување!

¹⁶Затоа тоа е од верата, за да биде по благодат, така што ветувањето да му биде обезбедено на сето потомство; не само на она од Законот, туку и на она од Авраамовата вера; кој е татко на сите нас,

¹⁷како што е напишано: „Те поставив татко на многу народи” - пред Бога; Кому Му поверува; Кој ги оживува мртвите и ги повикува оние нешта што не се во битие.

¹⁸Без надеж, тој се надеваше и поверува дека ќе стане татко на многу народи, според реченото: „Такво ќе биде твоето семе.”

¹⁹И не ослабна во верата, кога го имаше во предвид своето веќе умртвено тело, зашто беше околу сто години, и умртвеноста на Сарината утроба;

²⁰не се посомнева во Божјото ветување, туку зајакна во верата и Му даде слава на Бога,

²¹наполно уверен дека е силен да го исполни она што го ветил.

²²Затоа тоа му се засмета за праведност.

²³Но не е напишано само за него „дека му се засмета”

²⁴туку и за нас на кои ќе ни се засмета, затоа што веруваме во Оној, Кој Го воскресна од мртвите Исуса, нашиот Господ.

²⁵Кој беше предаден за нашите гревови и беше воскреснат за наше оправдание.