Read Библија, Константинов Римјаните 7 Bible Online

Римјаните 7 - Библија, Константинов bible

Римјаните 7

¹Или не знаете ли, браќа - им зборувам на оние, кои го познаваат Законот, дека законот има власт над човекот додека е жив?

²Така, омажената жена преку закон е врзана за мажот, додека е тој жив; но ако мажот умре, слободна е од законот, што ја сврзал со мажот.

³Според тоа, ако му стане жена на друг, додека нејзиниот маж живее, ќе биде прељубница; но ако мажот и умре, слободна е од законот, и не е прељубница, ако се омажи за друг.

⁴Така и вие, браќа мои, умревте за законот преку Христовото тело, за да Му припаднете на Другиот, Кој воскресна од мртвите, за да Му донесеме плод на Бога.

⁵Зашто, додека бевме во телото, во нашите членови дејствуваа грешни страсти, кои Законот ги побудуваше, така што ги донесувавме плодовите на смртта.

⁶А сега, се ослободивме од Законот, откако умревме за оној, кој нè потчинуваше, за да служиме во нов дух, а не во старата буква.

⁷И така, што да речеме? Дали е Законот грев? Далеку од тоа! Сепак, јас го запознав гревот само преку Законот, зашто не би ја запознал страсната желба, ако Законот не рече: „Не ќе пожелуваш!”

⁸А гревот најде повод во заповедта и предизвика во мене секаква желба, зашто без Закон - гревот е мртов.

⁹И јас живеев некогаш без Законот; но кога дојде заповедта гревот оживе, а јас умрев;

¹⁰и се покажа дека заповедта, што беше дадена за живот, ме водеше во смрт;

¹¹имено, гревот, откако доби повод во заповедта, ме заведе и ме уби преку неа.

¹²Затоа Законот е свет; а и заповедта е света, и праведна, и добра.

¹³Дали тоа значи дека доброто стана смрт за мене? Да не биде! Туку гревот, за да се покаже како грев, се послужи со доброто и ми предизвика смрт, за да стане гревот - со посредство на заповедта - прекумерно грешен.

¹⁴Зашто знаеме дека Законот е духовен, а јас сум телесен, продаден, под грев.

¹⁵Така, не знам што правам; зашто не го правам она, што го сакам, туку го правам она, што го мразам.

¹⁶Ако пак го правам, она што не го сакам, се согласувам со Законот дека тој е добар.

¹⁷Зашто тоа веќе не го правам јас, туку гревот, кој живее во мене.

¹⁸Имено, јас знам дека никакво добро не живее во мене, односно во моето тело; зашто, желба за добро има во мене, но не и сила за да го правам тоа,

¹⁹зашто не го правам доброто, што го сакам, туку го правам злото, што не го сакам.

²⁰А ако го правам она што не го сакам, не го правам веќе јас, туку гревот, кој живее во мене.

²¹И така, го наоѓам овој закон: дека кога сакам да правам добро, злото е близу.

²²Вистина, со мојот внатрешен човек наоѓам наслада во Божјиот Закон,

²³но, гледам друг закон во моите членови, кој војува против законот на мојот ум, и ме заробува под законот на гревот, што е во моите членови.

²⁴Беден човек сум јас! Кој ќе ме спаси од ова смртоносно тело!

²⁵Му благодарам на Бога преку Исуса Христа, нашиот Господ!

²⁶И така, јас самиот со умот му служам на Божјиот Закон, а со телото на законот на гревот.