Read Библија, Константинов 1 Коринќаните 14 Bible Online

1 Коринќаните 14 - Библија, Константинов bible

1 Коринќаните 14

¹Стремете се кон љубовта! Ревнувајте за духовните нешта, а особено да можете да пророкувате!

²Зашто, кој зборува на јазик, не им зборува на луѓето, туку на Бога; имено, никој не го разбира, но зборува тајни во својот дух.

³А кој пророкува, им зборува на луѓето: за поука, опомена и утеха.

⁴Кој зборува на јазик се изградува себеси, а кој пророкува изградува црквата.

⁵Би сакал сите да зборувате јазици, а уште повеќе да пророкувате; зашто, оној, кој пророкува е поголем од оној, кој зборува јазици; освен ако ги толкува, та заедницата да добие надградба.

⁶А сега, браќа, ако дојдам при вас и ви зборувам на непознати јазици, каква полза ќе имате од мене, ако не ви соопштам или по пат на откровение, или знаење, или пророштво, или поука?

⁷И бездушните нешта, што даваат глас, како свиролот или харфата, ако не даваат различни звуци, како ќе се познае свирењето на свиролот или харфата?

⁸Ако трубата дава неопределен звук, кој ќе се подготвува за бој?

⁹Така и вие: ако со јазикот не изговарате разбирливи зборови, како ќе се разбере што зборувате? Ќе зборувате во ветер.

¹⁰Во светот има кој знае колку разни гласови, и ниеден не е без значење,

¹¹или, ако не го познавам значењето на говорот, ќе му бидам странец на оној, кој зборува; а оној кој зборува, ќе ми биде туѓинец мене.

¹²Така и вие, бидејќи покажувате ревност за духовните нешта, настојувајте да ги имате во изобилство за надградба на црквата!

¹³Затоа оној кој зборува на јазик, нека се моли за да може да го толкува.

¹⁴Зашто, ако се молам на непознат јазик, мојот дух се моли, но мојот ум останува без плод.

¹⁵Што значи тоа? Ќе се молам со духот, но ќе се молам и со умот; ќе пеам со духот, но ќе пеам и со умот.

¹⁶Зашто ако ти благословуваш со духот, како неупатениот ќе рече: „Амин”, на твоето благодарење, кога не знае што зборуваш?

¹⁷Зашто, ти навистина благодариш, но другиот не се надградува.

¹⁸Му благодарам на Бога дека зборувам повеќе јазици од сите вас;

¹⁹но во заедницата повеќе сакам да речам пет збора со мојот ум, за да ги поучувам и другите, отколку десет илјади зборови на непознат јазик.

²⁰Браќа, не бидете деца во умот, туку бидете младенци во злобата, а во умот бидете зрели луѓе!

²¹Во Законот е напишано: „Преку луѓе, кои говорат на друг јазик и преку усните на туѓинци, ќе му зборувам на овој народ, но и тогаш нема да Ме послушаат - говори Господ.”

²²Затоа јазиците се знак не за оние кои веруваат, туку за неверниците; пророштвото пак не е за неверниците, туку за оние, кои веруваат.

²³Ако пак целата црква се собере на едно место, и ако сите зборуваат на непознати јазици, и ако влезат неупатени или неверници, нема ли да речат дека сте полуделе?

²⁴Но, ако сите пророкувате, а влезе некој неверник или неупатен, од сите е уверен, и од сите е осуден;

²⁵тајните на неговото срце се откриваат. И откако ќе падне на своето лице, ќе Го прослави Бога и ќе исповеда дека Бог е навистина меѓу вас.

²⁶Што тогаш, браќа? Кога се собирате, секој од вас има псалм, има поука, има откровение, има јазик, има толкување. Сè нека биде за надградување!

²⁷Ако некој зборува на јазик; нека зборуваат по двајца, или најмногу по тројца, и тоа по ред, а еден нека толкува!

²⁸Ако нема толкувач, нека молчи во црквата; и нека си зборува сам на себе и на Бога!

²⁹Пророците пак нека зборуваат двајца или тројца, а другите да расудуваат.

³⁰Ако некому, од седнатите, му дојде откровение, првиот нека замолчи!

³¹Зашто сите можете да пророкувате, еден по еден, за да се поучуваат сите и за да се охрабруваат сите.

³²И пророчките духови им се покоруваат на пророците,

³³зашто Бог не е Бог на безредие, туку на мирот, како што е во сите цркви на светите.

³⁴Жените да молчат во црквите; зашто ним не им е дозволено да зборуваат, туку да се покоруваат, како што вели Законот.

³⁵Ако сакаат да научат нешто, нека ги прашаат своите мажи дома, зашто е срамно жената да зборува во црква.

³⁶Или од вас ли излезе Божјото слово! Или само до вас стигна?

³⁷Ако некој мисли дека е пророк или духовен, нека разбере дека ова, што ви го пишувам, е Господова заповед!

³⁸А кој не сака да го препознае ова, нека не биде препознаен!

³⁹Затоа, браќа мои, ревнувајте за пророкување и не забранувајте да се зборува во јазици!

⁴⁰И нека сите работи се вршат пристојно и уредно!