Read Библија, Константинов 1 Коринќаните 4 Bible Online

1 Коринќаните 4 - Библија, Константинов bible

1 Коринќаните 4

¹И така, секој човек нека нè смета за Христови служители и за управители на Божјите тајни!

²А од управителите натаму се бара секој да се покаже верен.

³За мене сосем малку ми значи, што ме осудувате вие, или друг човечки суд; а ни самиот јас не се судам себеси.

⁴Зашто не знам дека сум виновен во нешто, но со тоа не сум оправдан. Туку, Господ е Тој, Кој ќе ме суди.

⁵Затоа не судете ништо предвреме, пред да дојде Господ, Кој ќе го извади на видело скриеното во темнина и ќе ги открие намерите на срцата; и тогаш секој ќе ја прими пофалбата од Бога.

⁶А врз себе и врз Аполоса покажав пример, браќа, заради вас, за да научите од нас да не мудрувате повеќе од она, што е напишано, и да не се вообразувате еден над друг.

⁷Зашто, кој те прави да се разликуваш од другиот ? И што имаш, што не си примил? И така, ако си примил, зошто се фалиш како да не си примил?

⁸Веќе сте заситени! Веќе се збогативте! Без нас се зацаривте. И камо да се бевте зацариле, та и ние да царуваме со вас!

⁹Зашто ми се чини, Бог нè постави нас апостолите најпоследни, како осудени на смрт; зашто им станавме призор на светот, и на ангелите и на луѓето.

¹⁰Ние сме безумни заради Христа, а вие сте мудри во Христа! Ние сме слаби, а вие, јаки; вие сте славни, а ние без чест.

¹¹До овој час гладуваме и жеднееме, и необлечени сме, и нè бијат, и скитаме,

¹²и се трудиме работејќи со своите раце. Кога нè навредуваат, ние благословуваме; кога нè гонат, ние поднесуваме;

¹³кога нè клеветат ние се обраќаме благо. Станавме како нечистотија на светот, како смет исфрлен од сите, сè досега.

¹⁴Не го пишувам ова за да ве засрамам, туку за да ве предупредам како свои возљубени чеда,

¹⁵зашто, ако имавте и десет илјади воспитувачи во Христа; сепак немате многу татковци, зашто јас ве родив во Христа Исуса преку Евангелието.

¹⁶Затоа, ве молам подражавајте ме мене.

¹⁷Затоа и го испратив при вас Тимотеја, моето возљубено и верно чедо во Господа. Тој ќе ви ги напомни моите патишта во Христа, како што ги учам насекаде, и во секоја црква.

¹⁸Некои се вообразија, како јас да нема да дојдам при вас.

¹⁹Но наскоро, ќе дојдам при вас, ако биде Господова волја, и тогаш не ќе сакам да знам за зборовите на оние вообразените, туку за нивната сила,

²⁰зашто Божјото Царство не е во зборови, туку во сила.

²¹Што сакате: да дојдам при вас со прачка, или со љубов и со кроток дух?