Read Библија, Константинов 1 Коринќаните 6 Bible Online

1 Коринќаните 6 - Библија, Константинов bible

1 Коринќаните 6

¹Смее ли некој од вас, ако има спор против друг, да се суди пред неправедните, а не пред светите?

²Или не знаете ли дека светите ќе му судат на светот? И ако вие ќе му судите на светот, не сте ли достојни да судите во сосем мали спорови?

³Не знаете ли дека ќе им судиме на ангелите! А колку повеќе тогаш, работите во животот!

⁴И така, ако имате обични спорови, дали ги поставувате за судии оние, кои се малку ценети во црквата!

⁵Зборувам за ваш срам. Вистина ли е дека меѓу вас нема ниеден мудар, кој би можел да пресуди меѓу своите браќа?

⁶Туку брат се суди со брат, и тоа пред неверници!

⁷Без сомнение, тоа е за сите вас неуспех, дека имате парници помеѓу себе. Зошто порадо не ја претрпите неправдата? Зошто порадо не ја прежалите штетата?

⁸Туку вие сами ги онеправдувате и оштетувате, и тоа браќата!

⁹Или не знаете ли дека неправедниците нема да го наследат Божјото Царство? Не измамувајте се! Ни блудниците, ни идолопоклониците, ни прељубниците, ни мекушците, ни изопачените мажи (содомци),

¹⁰ни крадците, ни лакомците, ни пијаниците, ни клеветниците, ни разбојниците, нема да го наследат Божјото Царство.

¹¹И некои од вас беа такви. Но, се измивте, и се осветивте, и се оправдавте во името на нашиот Господ Исус Христос и во Духот на нашиот Бог.

¹²Сè ми е дозволено, но не е сè полезно. Сè ми е дозволено, но не сакам нешто да завладее над мене.

¹³Храната е за стомакот, а стомакот за храната; Бог ќе ги уништи и едното и другото. А телото не е за блудство, туку за Господа, и Господ за телото;

¹⁴а Бог, Кој Го воскресна Господа, ќе нè воскресне и нас со Својата сила.

¹⁵Не знаете ли дека вашите тела се Христови членови? И така, ќе ги земам ли Христовите членови и да ги направам членови на блудница? Да не биде!

¹⁶Или не знаете ли дека оној кој ќе се соедини со блудница е едно тело со неа? Зашто рече: „Обата ќе бидат едно тело.”

¹⁷А кој се соединува со Господа, еден дух е со Него.

¹⁸Бегајте од блудство! Секој грев, што човекот го прави, е надвор од телото; а блудникот греши против своето сопствено тело.

¹⁹Или не знаете дека вашето тело е храм на Светиот Дух, Кој е во вас, Кого го имате од Бога, па не си припаѓате само на себеси?

²⁰Зашто скапо сте купени. И така, прославете Го Бога во своето тело и во својот дух, кои се Божји.