Read Библија, Константинов 1 Коринќаните 7 Bible Online

1 Коринќаните 7 - Библија, Константинов bible

1 Коринќаните 7

¹Што се однесува за она за што ми пишавте: добро е за човекот да не се допира до жена,

²но заради блудствата секој нека има своја жена и секоја жена свој маж.

³Мажот нека ја исполнува својата должност спрема жената; а исто така и жената спрема мажот!

⁴Жената нема власт над своето тело, туку мажот; исто така и мажот нема власт над своето тело, туку жената.

⁵Не лишувајте се еден од друг, освен по договор, за некое време, за да и се предадете на молитвата; потоа состанувајте се пак, за да не ве искушува сатаната, заради вашата невоздржаност.

⁶Ова ви го велам како дозвола, а не како заповед.

⁷Јас би сакал сите луѓе да бидат исто како и јас; но секој има од Бога свој дар, еден ваков друг онаков.

⁸На неженетите и на вдовиците им велам дека е добро за нив, да останат исто како и јас.

⁹Но, ако не можат да се воздржуваат, нека се женат и мажат, зашто е подобро да влегуваат во брак отколку да се распалуваат.

¹⁰А на сопружниците не им наредувам јас, туку Господ: жената да не го напушта мажот;

¹¹ако го напушти нека остане немажена или нека се помири со својот маж; и мажот да не ја остава својата жена.

¹²А на другите им велам јас, а не Господ: ако некој брат има жена која не верува, а која се согласува да живее со него, да не ја напушта!

¹³А жената која има маж, кој не верува, а кој се согласува да живее со неа, да не го напушта мажот,

¹⁴зашто мажот кој не верува се осветува преку жената, а жената која не верува се осветува преку мажот. Инаку вашите деца би биле нечисти, а сега се свети.

¹⁵Но, ако оној кој не верува напушти - нека напушти! Во таков случај братот или сестрата не се врзани како робови, зашто Бог нè повикал да живееме во мир.

¹⁶Зашто, откаде знаеш ти, жено, дали не ќе го спасиш мажот? Или откаде знаеш ти, мажу, дека не ќе ја спасиш жената?

¹⁷Впрочем, секој нека оди онака, како што Господ му доделил, како што Бог го повикал! Така наредувам по сите цркви.

¹⁸Обрезан ли е повикан некој, да не го крие обрезанието; необрезан ли е повикан некој, да не се обрезува!

¹⁹Обрезанието е ништо, и необрезанието е ништо, туку извршувањето на Божјите заповеди.

²⁰Секој нека остане онаков каков е повикан!

²¹Ако си повикан како роб? Не грижи се! Туку, ако можеш да станеш и слободен, подобро искористи го тоа,

²²зашто оној, кој е повикан како роб во Господа, слободен е во Господа; исто така и оној, кој е повикан како слободен, роб е на Христа.

²³Скапо сте купени! Не бидете им робови на луѓето!

²⁴Браќа, секој нека остане пред Бога во она во што е повикан.

²⁵За девиците немам заповед од Господа, но го кажувам своето мнение како оној, кој, добивајќи ја Господовата благодат, е достоен за доверба.

²⁶Според тоа, сметам дека ова е добро заради сегашната потреба; дека е добро за човекот да остане таков, како што си е.

²⁷Сврзан ли си со жена? Не барај развод! Разврзан ли си од жена? Не барај жена!

²⁸Но, иако се ожениш, не грешиш; а ни девицата не греши ако се омажи. Но, таквите ќе имаат телесни неволји, а јас пак се обидувам да ве поштедам.

²⁹Браќа, ви го велам ова: времето е кратко. Затоа, и оние кои имаат жени, да бидат како да ги немаат;

³⁰и кои плачат, како да не плачат; и кои се радуваат, како да не се радуваат; и кои купуваат, како да немаат;

³¹и кои го ползуваат овој свет, како да не го ползуваат, зашто поминува обликот на светов.

³²Би сакал да бидете без грижи. Оној кој не е во брак се грижи за она што е Господово; како да Му угоди на Господа.

³³А женетиот се грижи за земното: како да и угоди на жената,

³⁴та вниманието му е поделено. И немажената жена, девицата, се грижи за Господовото, за да биде света во телото и во духот; а мажената се грижи за светското: како да му угоди на мажот.

³⁵Ова го зборувам за ваша сопствена полза. Не за да ви поставам јамка, туку за да бидете чесни и за да Му служите без пречки истрајно на Господа.

³⁶Мисли ли некој дека постапува неприлично со својата девственост, ако навлегол во години, и дека така треба да биде, нека прави како што сака: не греши, нека се женат!

³⁷А оној, кој стои цврсто во своето срце и нема потреба, туку владее со својата волја, па решил во своето срце да ја запази својата девственост, добро прави;

³⁸така, оној кој се жени, добро прави; а оној којшто не се жени, прави подобро.

³⁹Жената е сврзана додека мажот и е жив. Ако и умре мажот, слободна е да се премажи за кого сака, само во Господа!

⁴⁰Но, според моето мислење, ќе биде посреќна, ако остане така; а мислам дека и јас имам Божји Дух.