Read Библија, Константинов 1 Коринќаните 9 Bible Online

1 Коринќаните 9 - Библија, Константинов bible

1 Коринќаните 9

¹Не сум ли апостол? Не сум ли слободен? Не го видов ли Исуса, нашиот Господ? Не сте ли вие мое дело во Господа?

²Ако не сум им апостол на другите, но вам ви сум: зашто вие сте печат на моето апостолство во Господа.

³Тоа е мојата одбрана пред оние, кои ме испитуваат.

⁴Немаме ли право да јадеме и пиеме?

⁵Немаме ли право да водиме жена од сестрите, како и другите апостоли и Господовите браќа, и Кифа?

⁶Или само јас и Варнава немаме право да се воздржиме од работа?

⁷Кој војник служи некогаш на своја сметка? Кој сади лозје, а не јаде од неговиот плод? Или кој пасе стадо, а не јаде млеко од стадото?

⁸Го зборувам ли ова само по човечки? Не го вели ли ова и Законот?

⁹Навистина, во Мојсеевиот Закон е напишано: „Не врзувај му ја устата на волот, што врши!”- Зар Бог се грижи за воловите?

¹⁰Или го вели тоа главно за нас? Да, тоа е напишано за нас, зашто кој ора треба да ора во надеж, и кој врши, да врши во надеж дека ќе го добие својот дел.

¹¹Ако ние посеавме во вас духовни добра, дали е нешто големо ако ги жнееме вашите телесни добра?

¹²Ако други го имаат тоа право над вас, немаме ли ние поголемо? Но ние не се служиме со тоа право, туку поднесуваме сè, за да не му поставиме некаква пречка на Христовото Евангелие.

¹³Не знаете ли дека се хранат од храмот оние, кои исполнуваат света служба, и дека служителите на жртвеникот добиваат дел од жртвеникот?

¹⁴Така, Господ им нареди на оние, кои го проповедаат Евангелието, да живеат од Евангелието.

¹⁵А јас не се ползував со ништо од сè тоа. А и ова не го напишав за да ми биде така, зашто за мене е подобро да умрам, отколку некој да ми ја уништи пофалбата.

¹⁶Ако пак го проповедам Евангелието нема за што да се фалам, зашто неопходноста ми е наложена. И тешко мене, ако не го проповедам Евангелието!

¹⁷Ако го правам тоа доброволно, имам награда; но, ако не го правам по своја волја, сè уште мене ми е доверено управувањето.

¹⁸Која е тогаш мојата награда? Проповедајќи, бесплатно да го давам Евангелието; и да не го исползувам наполно своето право во Евангелието.

¹⁹Навистина, иако сум слободен од сите, се претворив во роб на сите, за да ги придобијам што повеќе.

²⁰На Јудејците им бев како Јудеец, за да ги придобијам Јудејците; на оние кои се под Законот им бев како и самиот да сум под Законот, иако јас не сум под Законот, за да ги придобијам оние, кои се под Законот.

²¹На оние, кои се без закон, им бев како да сум и јас без закон, иако не сум без Божјиот Закон, туку сум под Христовиот Закон, за да ги придобијам оние, кои се без закон.

²²На слабите им бев слаб, за да ги придобијам слабите; на сите им станав сè, та по секаков начин да спасам некои.

²³А сè тоа го правам заради Евангелието, за да имам дел во него.

²⁴Не знаете ли дека во тркалиштето трчаат сите тркачи, но само еден добива награда! Трчајте така и вие, за да ја добиете!

²⁵Секој натпреварувач се воздржува од сè; тие, за да добијат распадлив венец, а ние нераспадлив.

²⁶Затоа јас трчам така, не како кон неизвесно; и се борам така, не како оној, кој го бие ветерот;

²⁷туку го совладувам своето тело и го правам свој роб, та јас кој им проповедав на другите, да не бидам самиот непожелен.