Read Библија, Константинов Галатите 3 Bible Online

Галатите 3 - Библија, Константинов bible

Галатите 3

¹О неразумни Галатјани! Кој ве маѓепса вас, пред чии очи Исус Христос е јасно нацртан како распнат?

²Сакам само ова да го научам од вас: дали Го примивте Духот врз основа на делата на Законот или преку слушањето со вера?

³Толку ли сте неразумни? Што почнувајќи со Духот, сега сами завршувате со тело?

⁴Дали толку многу страдавте напразно? Ако е навистина напразно!

⁵А Оној, Кој ви дава Дух и прави силни дела во вас, дали го прави тоа врз основа на делата на Законот или преку слушањето со вера?

⁶Како што и Авраам „му поверува на Бога и тоа му се засмета за праведност.”

⁷И така, признајте, дека Авраамови синови се оние, кои се од верата.

⁸А и Писмото предвиде, дека Бог преку верата ги оправдува народите, и однапред му го навести Евангелието на Авраама: „Во тебе ќе бидат благословени сите народи.”

⁹И така, оние, кои веруваат се благословени заедно со верниот Авраам.

¹⁰Имено, кои ги прават делата на Законот, под клетва се, зашто е пишано: „Проклет да е секој, кој не е постојан во сè што е напишано во Книгата на Законот, да го исполнува тоа.”

¹¹А дека никој не е оправдан пред Бога преку Законот, јасно е, зашто „праведникот ќе живее од верата.”

¹²А Законот не е од верата, туку вели: „Кој ги исполнува, ќе живее преку нив.”

¹³Христос нè откупи од проклетството на Законот, откако стана проклетство за нас, зашто е пишано: „Проклет да е секој, кој виси на дрво!” -

¹⁴Та Авраамовиот благослов да дојде на народите во Христа Исуса, и да Го примиме преку верата ветувањето на Духот.

¹⁵Браќа, зборувам по човечки: заветот што човек го потврдил, никој не го отфрла, ниту му додава нешто.

¹⁶А ветувањата им беа дадени на Авраама и на неговото семе. И не вели: „и на семињата”, како за мнозина; туку како за еден: „и на твоето Семе” Кој е Христос.

¹⁷Го велам и ова: Законот што стана по четири стотини и триесет години, не го поништува заветот, кого Бог го потврдил порано, ниту го поништува ветувањето.

¹⁸Зашто, ако наследството доаѓа од Законот, тоа веќе не е од ветувањето; но Бог му го подари на Авраама преку ветувањето.

¹⁹Тогаш, зошто е Законот? Тој е определен со посредство на ангели, со рака на еден посредник, па е додаден заради престапите, додека не дојде Семето, Кому Му е дадено ветувањето.

²⁰Посредник пак нема таму, каде што е само еден; а Бог е еден.

²¹Според тоа, дали е Законот противен на Божјите ветувања? Далеку од тоа! Зашто, ако беше даден закон, што може да даде живот, тогаш навистина праведноста би била од законот.

²²Но Писмото сите ги затвори под грев, и врз основа на верата во Исуса Христа ветувањето да им биде дадено на оние, кои веруваат.

²³А пред да дојде верата, бевме под стражата на законот, затворени, до времето на верата која требаше да се открие.

²⁴Така, Законот ни беше наш воспитач до Христа, за да се оправдаме преку верата.

²⁵А сега дојде верата, и не сме повеќе под воспитувачот.

²⁶Зашто, сите сте Божји синови преку верата во Христа Исуса,

²⁷зашто сите, кои се крстивте во Христа, се облековте со Христа.

²⁸Нема веќе ни Јудеец ни Грк, нема веќе ни роб ни слободен, нема веќе ни машко ни женско, зашто вие сите сте едно во Христа Исуса.

²⁹А ако сте пак вие Христови, тогаш сте Авраамово семе, наследници по ветувањето.