Read Библија, Константинов Ефешаните 1 Bible Online

Ефешаните 1 - Библија, Константинов bible

Ефешаните 1

¹Павле, преку Божја волја апостол на Исуса Христа, до светите во Ефес и верните во Христа Исуса:

²благодат на вас и мир од Бога, нашиот Татко и од Господа Исуса Христа!

³Да биде благословен Бог и Таткото на нашиот Господ Исус Христос, Кој нè благослови, во Христа, со секаков духовен благослов во небесните места;

⁴зашто нè избра во Него, пред создавањето на светот, за да бидеме свети и непорочни пред Него во љубов.

⁵Како што нè и определи однапред за да нè посини преку Исуса Христа, по благоволение на Својата волја,

⁶за да биде фалена славата на Неговата благодат, со која нè дарува во Возљубениот,

⁷во Кого имаме откуп преку Неговата крв, прошка на гревовите, според богатството на Неговата благодат,

⁸која ја излеа изобилно на нас во секоја мудрост и разумност, -

⁹соопштувајќи ни ја тајната на Својата волја, според Своето благоволение, што го одреди во Него,

¹⁰за да ја спроведе кога ќе се исполнат времињата: за да соедини повторно во Христа: сè што е на небесата и што е на земјата - во Него,

¹¹во Кого и ние бевме избрани за наследници, зашто бевме определени однапред со одлуката на Оној, Кој прави сè по советот на Својата волја,

¹²за да бидеме за пофалба на Неговата слава, ние, кои веќе отпорано се надевавме во Христа.

¹³Во Него и вие, откако го чувте словото на вистината - Евангелието на вашето спасение - и откако и вие поверувавте, станавте запечатени со Светиот Дух на ветувањето.

¹⁴Кој е залог за нашето наследство, за откупување на оние кои станаа Божја сопственост - за пофалба на Неговата слава.

¹⁵Затоа и јас, откако чув за вашата вера во Господа Исуса и за вашата љубов кон сите свети,

¹⁶не прекратувам да заблагодарувам за вас, спомнувајќи ве во своите молитви,

¹⁷та Бог на нашиот Господ Исус Христос, Таткото на славата, да ви даде дух на мудрост и откровение во вистинското познавање на Него:

¹⁸и да ги избистри очите на вашето срце, за да знаете каква е надежта на Неговото повикување, колкаво е богатството на Неговото славно наследство во светите,

¹⁹и колку е преголема Неговата сила кон нас, кои веруваме - според дејствувањето на Неговата моќна сила;

²⁰чие дејство го покажа во Христа, кога Го воскресна од мртвите и Го постави оддесно на Себеси во небесните места,

²¹далеку над секое началство, и власт, и сила, и господство и над секое име, кое се спомнува не само во овој свет, туку и во идниот.

²²И сè Му покори под Неговите нозе, а Него Го постави за Глава над сè на Црквата,

²³која е Негово Тело - полнота на Оној, Кој исполнува сè во сè.