Read Библија, Константинов Ефешаните 4 Bible Online

Ефешаните 4 - Библија, Константинов bible

Ефешаните 4

¹Затоа ве молам, јас затвореник во Господа, да живеете достојно според звањето во кое сте повикани:

²со секаква понизност и кроткост, со трпеливост, поднесувајќи се едни со други во љубов!

³Настојувајте да го запазите единството на Духот во врската на мирот.

⁴Едно тело и еден Дух, како што сте и вие повикани во една надеж на вашето звање;

⁵еден Господ, една вера и едно крштавање;

⁶еден Бог и Татко на сите, Кој е над сите, и преку сите и во сите.

⁷А секому од нас му е дадена благодатта според мерката на Христовиот дар.

⁸Затоа се вели: „Издигајќи се на височина, поведе робје; им даде дарови на луѓето.”

⁹А „се издигна” - што значи друго, туку дека слегол во долните места на земјата?

¹⁰Тој Кој слезе, тоа е Оној истиот, Кој се издигна над сите небеса, за да исполни сè.

¹¹И Тој даде едни за апостоли, а други за пророци; едни за евангелисти, а други за пастири и учители,

¹²за да се усовршат светите за делото на службата, за изградување на Христовото Тело,

¹³додека сите не дојдеме до единството на верата и на познавањето на Божјиот Син, до совршениот човек, до полната мерка на Христовиот раст:

¹⁴за да не бидеме веќе деца, кои ги лулее и ги носи секој ветар на науката, што - со човечката измама и лукавство - доведува до итро измислени заблуди.

¹⁵Туку, говорејќи ја вистината, во љубов, ние треба да растеме во сè - кон Него, Кој е Глава, Христос.

¹⁶Од Него целото Тело е поврзано и соединето во едно, на тој начин што секој дел дава поткрепа според една мерка на секој одделен дел; тоа прави Телото да расте за својата сопствена надградба во љубов.

¹⁷Ова го велам и сведочам во Господа, да не живеете веќе како што одат народите во суетата на својот ум,

¹⁸помрачени во својот разум, оттуѓени се од Божјиот живот, заради незнаењето кое владее во нив, заради закоравеноста на нивното срце.

¹⁹Откако го изгубија чувството, тие и се предадоа себеси на разузданоста, за да прават секаква нечистота во лакомост.

²⁰А вие не Го познавте така Христа,

²¹ако сте чуле за Него и ако сте во Него поучени онака, како што е вистината во Исуса;

²²во однос на својот поранешен живот, вие треба да го соблечете од себе стариот човек, кој тлее заради измамливите страсни желби,

²³и да се обновувате во духот на својот ум,

²⁴и да се облечете во новиот човек, кој е создаден според Бога во правдата и светоста на вистината.

²⁵Затоа отфрлете ја лагата и зборувајте вистина секој со својот ближен, зашто сме членови едни на други!

²⁶Ако сте гневни, не грешете! Сонцето да не зајде во вашиот гнев,

²⁷и не давајте му место на ѓаволот!

²⁸Кој крадел, да не краде веќе! Подобро е да се труди и да работи со своите раце она што е добро, за да може да му дава на оној, кој има потреба!

²⁹Никаков гнил збор да не излегува од вашата уста, туку само полезен за изградување, - каде е потребно, за да им даде благодат на слушателите.

³⁰И не жалостете Го Светиот Дух Божји, со Кој сте запечатени за денот на избавувањето!

³¹Секое огорчение, и јарост, и гнев, и викање и хулење, да бидат отстранети од вас, со секаква злоба.

³²Бидете еден кон друг добри, милостиви, проштавајќи си еден на друг, како што и Бог ви прости вам во Христа.