Read Библија, Константинов Ефешаните 5 Bible Online

Ефешаните 5 - Библија, Константинов bible

Ефешаните 5

¹И така, угледајте се на Бога, како возљубени деца,

²и одете во љубов, како што и Христос ве љубеше вас и Се предаде Себеси за нас, како принос и жртва на Бога за благопријатен мирис.

³А блудството и секаква нечистота или лакомост, да не се спомнуваат меѓу вас, како што им прилега на светите!

⁴Ниту срамни и празни зборови, ниту смешки, што се неприлични, туку подобро благодарност!

⁵Зашто, знајте го ова добро: ниеден блудник, ниеден нечист, ниеден лакомец - кој е идолопоклоник - нема наследство во Христовото и Божјото Царство!

⁶Никој да не ве мами со празни зборови, зашто заради тие нешта доаѓа Божјиот гнев врз непокорните синови.

⁷И така, не бидете нивни соучесници!

⁸Зашто некогаш бевте темнина, но сега сте светлина во Господа; живеете како деца на светлината,

⁹а плодот на Духот се состои во секаква добрина, во праведност и во вистина!

¹⁰Испитувајте што Му е угодно на Господа!

¹¹И не бидете соучесници во бесплодните дела на темнината, туку подобро: прекорувајте ги!

¹²Зашто е срамно да се зборува и за она што тие го вршат потајно.

¹³А сè што се прекорува станува јавно преку светлината, зашто сè што станува јавно, светлина е.

¹⁴Затоа се вели: „Стани, ти кој спиеш, воскресни од мртвите, и Христос ќе те осветли!”

¹⁵И така, внимавајте грижливо како живеете! Не како немудри, туку како мудри;

¹⁶искупувајте го времето, зашто дните се зли!

¹⁷Затоа не бидете неразумни, туку разберете што е Господова волја!

¹⁸И не се пијанете со вино, во кое е разузданоста, туку полнете се со Духот!

¹⁹Зборувајте си еден на другиот со псалми, и химни, и со духовни песни! Пејте Му на Господа и воспевајте Го во вашите срца!

²⁰Благодарете Му секогаш за сè на Бог и Таткото, во името на нашиот Господ Исус Христос!

²¹Покорувајте се еден на друг во страв од Христа!

²²Жените да им се покоруваат на своите мажи, како на Господа,

²³зашто мажот е глава на жената, како што е и Христос Глава на Црквата, и Тој е Спасител на Телото!

²⁴И како што Црквата Му се покорува на Христа, така да им бидат и жените покорни во сè на своите мажи.

²⁵Мажи, љубете ги своите жени, како што и Христос ја возљуби Црквата и Се предаде Сам Себеси за неа,

²⁶за да ја освети, очистувајќи ја со водно капење во словото,

²⁷и да ја претстави пред Себе славната Црква, која нема дамка, ниту брчка, или нешто слично, за да биде света и непорочна.

²⁸Така и мажите се должни да ги љубат своите жени како своите тела. Кој ја љуби својата жена, се љуби себеси.

²⁹Зашто никој никогаш не го замразил своето тело. Но го храни и го стоплува како и Христос Црквата.

³⁰Зашто, ние сме членови на Неговото Тело - од Неговото месо и Неговите коски.

³¹”Затоа човекот ќе ги остави татка си и мајка си и ќе се прилепи кон својата жена, и двајцата ќе станат едно тело.”

³²Оваа тајна е голема - а јас зборувам гледајќи на Христос и на Црквата.

³³И така, секој од вас да ја љуби својата жена како себеси, а жената да го почитува својот маж.