Read Библија, Константинов Ефешаните 6 Bible Online

Ефешаните 6 - Библија, Константинов bible

Ефешаните 6

¹Деца, слушајте ги своите родители во Господа, зашто тоа е право.

²”Почитувај ги својот татко и мајка - тоа е првата заповед со ветување -

³за да ти биде добро и за да живееш долго на земјата!”

⁴А вие, татковци, не дразнете ги вашите деца, туку воспитувајте ги во науката и опомената на Господа.

⁵Робови, слушајте ги вашите господари по тело со страв и трепет, во простота на своето срце, како Христа!

⁶Не служете само пред очите, како оние кои им угодуваат на луѓето, туку како Христови служители, кои од сета душа ја извршуваат Божјата волја!

⁷Служете доброволно како на Господа, а не на луѓе,

⁸знаејќи дека секој - роб или слободен - ако направи нешто добро, ќе го добие тоа од Господа!

⁹А вие, господари, постапувајте исто така со нив, без закани, знаејќи дека нивниот и вашиот Господар е на небесата! И дека Тој не гледа кој е кој!

¹⁰Најпосле, јакнете во Господа и во силата на Неговата моќ!

¹¹Облечете се во сето Божјо оружје, за да можете да им се спротивставите на измамите на ѓаволот.

¹²Зашто нашата борба не е против крвта и телото, туку против началствата, против властите, против светските владетели на темнината на овој век: против духовните сили на злото во небесните места.

¹³Затоа земете го сето Божјо оружје, за да можете да се браните во лош ден и откако ќе свршите сè, да се одржите!

¹⁴И така, стојте цврсто! Препашани со вистината преку бедрата, облечени во оклопот на правдата,

¹⁵обујте ги нозете со ревноста за Евангелието на мирот!

¹⁶При сè тоа земете го штитот на верата, со кого ќе можете да ги угаснете сите огнени стрели на нечестивиот!

¹⁷Земете го и шлемот на спасението и мечот на Духот - кој е Божјото слово,

¹⁸со секаква просба и молитва, молете се во Духот во секое време, и заради тоа бдејте со сето постојанство и со молба за сите свети

¹⁹и за мене, да ми се даде слово кога ќе ја отворам устата, за да можам да ја соопштувам смело тајната на Евангелието,

²⁰за кое сум пратеник во окови: за да зборувам смело како што и треба да зборувам.

²¹А за да знаете и вие сè за мене што работам и како сум, за сè ќе ве извести Тихик, возљубениот брат и верен слуга во Господа,

²²кого го праќам при вас токму затоа, за да научите како сме ние и за да ги утеши вашите срца.

²³Мир на браќата и љубов со вера од Бог Таткото и од Господа Исуса Христа!

²⁴Благодат со сите, кои беспрекорно Го љубат нашиот Господ Исус Христос!