Read Библија, Константинов Колошаните 3 Bible Online

Колошаните 3 - Библија, Константинов bible

Колошаните 3

¹И така, ако воскреснавте со Христа, барајте го она што е горе - каде што Христос седи оддесно на Бога.

²Мислете за она што е горе, не за она што е на земјата,

³зашто вие умревте и вашиот живот е сокриен со Христа во Бога!

⁴А кога ќе се јави Христос, нашиот живот, тогаш и вие ќе се јавите со Него во слава.

⁵И така, умртвете ги своите членови што се на земјата: блудството, нечистотата, страста, лошата желба и лакомството, што е идолопоклонство,

⁶заради кои доаѓа Божјиот гнев на непослушните синови.

⁷Меѓу кои и вие некогаш одевте, кога живеевте во нив.

⁸Но сега, отфрлете го и вие сè ова: гневот, јароста, злобата, хулењето, срамните зборови од својата уста.

⁹Не лажете се еден друг, зашто го соблековте стариот човек со неговите дела

¹⁰и облековте нов, кој се обновува во полно познавање по образот на Оној, Кој го создал,

¹¹каде нема веќе Грк ни Јудеец, обрезание и необрезание, варварин, Скит, роб, слободен, туку Христос е сè и во сè.

¹²И така, облечете се како Божји избраници, свети и возљубени, во милосрдно срце, благост, смиреност, кротост трпеливост!

¹³Трпете се еден со друг и проштавајте си еден на друг, ако некој има поплака против некого, како што и Господ ви прости вам, така проштавајте и вие!

¹⁴А над сето тоа облечете се во љубов, која сврзува сè во совршенство!

¹⁵И Христовиот мир да владее во вашите срца, за кого сте и повикани во едно тело; и бидете благодарни!

¹⁶Христовото слово да живее изобилно во вас; во секоја мудрост учете се и опоменувајте се еден друг со псалми, химни, духовни песни, пеејќи Му на Господа со благодат во вашите срца.

¹⁷И сè што правите со збор или дело, правете сè во името на Господа Исуса, благодарејќи Му на Бог Таткото преку Него.

¹⁸Жени, покорувајте им се на своите мажи, како што прилега во Господа!

¹⁹Мажи, љубете ги своите жени и не бидете груби кон нив.

²⁰Деца, слушајте ги вашите родители во сè, зашто тоа Му е угодно на Господа!

²¹Татковци, не ги дразнете своите деца, за да не станат малодушни!

²²Робови, слушајте ги во сè своите земни господари, не за очите како оние, кои им угодуваат на луѓето, туку во простотата на срцето, боејќи се од Господа!

²³Што и да правите, правете го од душата како за Господа, а не за луѓе,

²⁴знаејќи дека од Господа ќе ја примите наградата на наследството. Служете Му на Господа Христа!

²⁵Зашто, кој прави неправда, ќе ја прими обратно неправдата, и не се гледа кој е кој.