Read Библија, Константинов 1 Тимотеј 3 Bible Online

1 Тимотеј 3 - Библија, Константинов bible

1 Тимотеј 3

¹Верно е словото: кој ревнува за епископство, добра служба посакува.

²Според тоа, епископот треба да биде: непорочен, маж на една жена, трезвен, разумен, пристоен, гостољубив, способен за поучување;

³не пијаница, не жесток, не лаком, туку благороден, не наклонет на препирка, не среброљубец,

⁴кој управува добро со својот дом и има покорни деца со сета честитост,

⁵зашто ако не знае да управува со својот дом, како ќе се грижи за Божјата црква? -

⁶Да не е новообратен, за да не се возгордее и да падне во осудата на ѓаволот!

⁷А треба да има и добро сведоштво и од надворешните, за да не падне во прекорување и во стапица на ѓаволот.

⁸Исто така, ѓаконите треба да бидат чесни, не двојазични, да не сакаат многу вино, не лакоми на срамна печалба -

⁹кои ја пазат тајната на верата со чиста совест.

¹⁰И тие прво да бидат испитани, и после да ја вршат службата ако се непорочни.

¹¹Исто така жените нивни треба да бидат чесни, да не клеветат; трезвени и верни во сè.

¹²Ѓаконите да бидат мажи на една жена, кои управуваат добро со своите деца и со своите домови,

¹³зашто оние, кои ја извршиле добро својата служба добиваат чесна положба и голема смелост во верата во Христа Исуса.

¹⁴Ова ти го пишувам надевајќи се дека скоро ќе дојдам при тебе;

¹⁵но во случај да се подзабавам, да знаеш како да се однесуваш во Божјиот Дом, кој е црква на живиот Бог, столб и потпора на вистината.

¹⁶И по општо признание, голема е тајната на побожноста: Оној, Кој се јави во тело, беше оправдан во Духот, им се покажа на ангелите, беше најавуван меѓу народите, поверуван во светот, беше вознесен во слава.