Read Библија, Константинов 1 Тимотеј 5 Bible Online

1 Тимотеј 5 - Библија, Константинов bible

1 Тимотеј 5

¹Не укорувај строго постар човек, туку опоменувај го како татко, помладите како браќа,

²постарите жени како мајки, помладите како сестри со секаква чистота.

³Почитувај ги вдовиците, кои се вистински вдовици.

⁴Ако некоја вдовица има деца или внучиња, тие нека научат прво да покажат побожност кон своето семејство, и да им враќаат на своите родители, зашто тоа е добро и угодно пред Бога.

⁵А која е вистинска вдовица и останала сама, таа ја ставила својата надеж во Бога и е постојана деноноќно во просби и молитви.

⁶А онаа која живее сладострасно, жива е умрена.

⁷Пренеси го и ова: да бидат непорочни.

⁸Ако некој не се грижи за своите, особено за домашните, се одрекол од верата и е полош од оној кој не верува.

⁹Во вдовичкиот список да се запишува таква вдовица, која не е помлада од шеесет години, која била жена на еден маж,

¹⁰која има сведоштво за добри дела; ако ги одгледала децата, ако била гостољубива, ако им ги миела нозете на светите, ако им помагала на страдалниците; и ако одела по секое добро дело.

¹¹А помлади вдовици не примај, зашто кога ќе ги привлече насладата, спротивно на Христа, сакаат да се мажат,

¹²со што навлекуваат врз себе осуда, зашто отстапиле од првото убедување.

¹³А освен тоа, бидејќи се без работа, свикнуваат да одат по куќите. И не само без работа, туку се и зборлести и љубопитни, и зборуваат што не треба.

¹⁴И така, сакам младите вдовици да се мажат, да раѓаат деца, да водат домаќинство, за да не му даваат на противникот никаков повод за хулење.

¹⁵Имено, некои веќе застраниле и тргнале по сатаната.

¹⁶Ако некој верен или верна има вдовици, нека ги помага, и нека не биде оптеретувана црквата, за да може да им помага на оние кои се вистински вдовици.

¹⁷На старешините, кои управуваат добро, треба да им се укажува двојна чест, особено на оние кои се трудат во словото и поучуваат.

¹⁸Зашто Писмото вели: „Не заврзувај му ја устата на волот што врши!” и „Работникот ја заслужува својата плата.”

¹⁹Не примај обвинение против старешина, освен по изјава на двајца или тројца сведоци.

²⁰Оние кои грешат изобличи ги пред сите, за да имаат и другите страв.

²¹И те заколнувам пред Бога, и пред Христа Исуса, и пред избраните ангели, да го пазиш ова без предрасуди и да не правиш ништо по пристрасност!

²²Не полагај раце пребрзо на никого, не учествувај во туѓи гревови! Пази се чист себеси!

²³Не пиј веќе само вода, туку земај по малку вино, заради твојот желудник и честите боледувања.

²⁴Гревовите на некои луѓе се видливи и одат на суд пред нив, а на некои одат по нив.

²⁵Исто така и добрите дела се видливи, а и кои не се, не можат да се скријат.