Read Библија, Константинов 1 Тимотеј 6 Bible Online

1 Тимотеј 6 - Библија, Константинов bible

1 Тимотеј 6

¹Робовите, кои се подјармени, да ги сметаат своите господари достојни за секаква почест, за да не се хули Божјото име и науката.

²А оние кои имаат верни господари, да не ги презираат, затоа што се браќа, туку да им служат подобро, зашто оние кои се ползуваат од нивните услуги се верни и возљубени браќа! Така поучувај и проповедај!

³Ако некој поучува инаку и не ги следи здравите зборови на нашиот Господ Исус Христос и на науката на побожноста,

⁴тој е надуен и не знае ништо, туку боледува од желба за распрашувања и препирки од кои произлегуваат: зависта, расправиите, хулењата, лукавите сомневања,

⁵празни препирки меѓу луѓето со изопачен ум и лишени од вистината, кои мислат дека побожноста е средство за печалба.

⁶Побожноста и е голема печалба кога е здружена со чувство на задоволство.

⁷Зашто ништо не донесовме на овој свет, ниту можеме да однесеме нешто.

⁸А кога имаме храна и облека, да бидеме задоволни со тоа!

⁹А оние кои сакаат да се богатат, паѓаат во искушение, во стапица и во многу неразумни и штетни желби, што ги туркаат луѓето во пропаст и погибел,

¹⁰зашто среброљубието е корен на секакви зла; некои му се предадоа, се отстранија од верата и се прободија себеси со многу болки.

¹¹А ти, Божји човеку, бегај од сè тоа! И стреми се кон праведност, побожност, вера, љубов, трпеливост, кротост!

¹²Бори се во добрата борба на верата, зграби го вечниот живот, за кој си повикан, и за кого си дал добра исповед пред многу сведоци!

¹³Ти заповедам пред Бога, Кој оживува сè и пред Христа Исуса, Кој пред Понтие Пилат ја посведочи добрата исповед,

¹⁴да ја пазиш заповедта чиста и непорочна до јавувањето на нашиот Господ Исус Христос,

¹⁵кое - во свое време, ќе Го открие блажениот и единствениот Владетел, Цар над царевите и Господар над господарите;

¹⁶Кој единствено има бесмртност, живеејќи во непристапна светлина, Кого никој од луѓето не Го видел ниту може да Го види. Нему чест и вечна сила. Амин!

¹⁷Заповедај им на богатите на овој свет да не бидат горделиви и да не се надеваат на непостојаното богатство, туку во живиот Бог, Кој ни дава изобилно сè за наслада,

¹⁸да прават добро, да бидат богати во добри дела, да бидат дарежливи и заедничари;

¹⁹да собираат за себе благо како основа за иднината, за да зграбат вистински живот.

²⁰О Тимотеје, пази го она што ти е доверено, и отстранувај се од нечистите и празните разговори и спротивставувањата на лажно нареченото познавање,

²¹за кое некои се држат и така се отклонија од верата. Благодат со тебе. Амин!