Read Библија, Константинов 2 Тимотеј 2 Bible Online

2 Тимотеј 2 - Библија, Константинов bible

2 Тимотеј 2

¹И така, ти чедо мое, зајакнувај во благодатта, која е во Христа Исуса!

²И што си чул од мене, пред многу сведоци, довери им го на поверливите луѓе, кои ќе бидат способни да ги поучуваат и другите!

³Поднесувај ги со мене страдањата, како добар војник на Христа Исуса!

⁴Никој, кој е во воена служба, не се заплетува во работите на овој живот, за да му угоди на оној кој го повикал во војската.

⁵Исто така, ако некој се натпреварува, не добива венец ако не се натпреварува прописно.

⁶Земјоделецот кој се труди треба прв да вкуси од плодовите.

⁷Разбери што зборувам, Господ ќе ти даде да разбереш сè.

⁸Помни Го Исуса Христа, Кој воскресна од мртвите, Кој е од Давидовото потомство, според моето Евангелие,

⁹за кое страдам сè до окови, како некаков злосторник. Но Божјото слово не е оковано.

¹⁰Заради тоа издржувам сè заради избраните, та и тие да добијат спасение со вечна слава во Христа Исуса.

¹¹Веродостојно е словото: „Ако умревме со Него, со Него и ќе живееме;

¹²Ако трпиме, со Него и ќе царуваме; ако се одречеме од Него, и Тој ќе се одрече од нас;

¹³ако сме неверни, Тој останува верен! Зашто Сам Себе не може да се одрече.”

¹⁴Ова напомнувај го, заколнувај ги пред Бога, да не се препираат околу зборови, тоа е неполезно, туку е за пропаст на слушателите.

¹⁵Труди се грижливо, за да се покажеш себеси достоен пред Бога како работник, кој не треба да се срамува, кој правилно го проповеда словото на вистината!

¹⁶А отстранувај се од непристојни и празни зборови, зашто таквите сè повеќе ќе напредуваат во безбожност,

¹⁷а нивното слово ќе разјадува како рак; од кои се Именеј и Филет,

¹⁸кои се оддалечија од вистината, тврдејќи дека воскресението веќе станало и со тоа ја рушат верата на некои.

¹⁹Сепак цврсто стои Божјата основа, која го има овој печат: „Господ познава кои се Негови” и „Да отстапи од неправдата секој, кој Го именува Господовото име!”

²⁰А во голем дом има не само златни и сребрени садови туку и дрвени и земјани. Едните се за благородна, а другите за неблагородна употреба.

²¹И така, ако некој се очисти од овие, ќе биде сад за чесна употреба, осветен, полезен на домаќинот и приготвен за секое добро дело.

²²Бегај од младински желби! Стреми се кон правда, вера, љубов и мир со оние кои Го повикуваат Господа од чисто срце.

²³А отфрли ги безумните и неразумните распрашувања, знаејќи дека раѓаат борби!

²⁴А Господовиот слуга не смее да се расправа, туку треба да биде кроток кон сите, способен да поучува и да трпи;

²⁵да ги воспитува со кротост оние кои се противат, та не би ли им дал Бог покајание, за полно познавање на вистината,

²⁶за да се отрезнат од мрежата на ѓаволот, кој ги заробил за да ја исполнуваат неговата волја.