Read Библија, Константинов Тит 1 Bible Online

Тит 1 - Библија, Константинов bible

Тит 1

¹Павле, Божјиот слуга и апостол на Исуса Христа, според верата на Божјите избраници и познавањето на вистината, која е според побожноста,

²во надежта за вечен живот, што пред вечни времиња го вети Бог, Кој не лаже,

³а во свое време го јави Своето Слово преку прогласувањето, што ми е доверено мене според заповедта на Бога, нашиот Спасител - до Тит, вистинското чедо на заедничката вера:

⁴благодат, милост и мир од Бог Таткото и Господа Исуса Христа, нашиот Спасител.

⁵Затоа те оставив на Крит, за да го средиш несвршеното и за да поставиш старешини по сите градови, како што ти наредив:

⁶ако е некој непорочен, маж на една жена, ако има деца кои веруваат, кои не се обвинети заради разузданост или непокорност;

⁷зашто епископот како Божји домоуправител треба да биде непорочен: не самољубив, не гневлив, не пијаница, не тепач, не лаком за срамна печалба,

⁸туку гостољубив, пријател на доброто, разумен, праведен, благочестив, воздржлив,

⁹кој се држи цврсто за верното слово, согласно со науката, за да може и да опоменува во здравата наука и да ги изобличува оние кои се противат.

¹⁰Имено, има многу непокорни, празнословци и измамници, особено од обрезаните,

¹¹на кои треба да им се затвори устата, зашто тие заради срамна печалба растураат цели домови, учејќи го она што не треба.

¹²Еден од нив, нивен сопствен пророк, има речено: „Критјаните се секогаш лажливи, зли ѕверови, мрзливи трбуси!”

¹³Ова сведоштво е вистинско. Затоа изобличи ги строго, за да бидат здрави во верата,

¹⁴за да не им обрнуваат внимание на јудејските бајки и заповедите на луѓето кои се одвраќаат од вистината.

¹⁵За чистите сè е чисто; а за оние кои се нечисти и кои не веруваат, ништо не е чисто, туку им се онечистени и разумот и совеста.

¹⁶Исповедуваат дека Го познаваат Бога, но Го одречуваат со делата, како одвратни и непослушни и неподобни за какво и да е добро дело.