Read Библија, Константинов Тит 2 Bible Online

Тит 2 - Библија, Константинов bible

Тит 2

¹А ти говори за она што се сложува со здравата наука:

²старците да бидат трезвени, чесни, разумни, здрави во верата, во љубовта, во трпението;

³исто така постарите жени да се владеат како што доликува на свети, да не клеветат, да не се предаваат на многу вино, туку да бидат учителки за доброто,

⁴за да ги учат младите жени да ги љубат своите мажи и своите деца,

⁵да бидат разумни, чисти, добри домаќинки, покорни на своите мажи, за да не се хули Божјото Слово.

⁶Исто така, опоменувај ги младите да бидат здраворазумни,

⁷давајќи се во сè себеси како пример за добри дела, во науката - нерасипаност, достоинство,

⁸здраво и беспрекорно слово, за да се засрами секој противник, немајќи што да каже лошо за нас.

⁹Опоменувај ги робовите за да им се покоруваат на своите господари, да настојуваат да им угодат, да не им противречат,

¹⁰да не поткрадуваат, туку да ја покажат својата добра верност, та да ја украсуваат во сè науката на нашиот Спасител, Бога.

¹¹Зашто се јави Божјата благодат, која носи спасение за сите луѓе,

¹²која нè воспитува да се откажеме од безбожноста и светските похоти; да живееме разумно, праведно и побожно во сегашниов век,

¹³очекувајќи ја блажената надеж и славното јавување на нашиот Сèмоќен Бог и Спасител, Исус Христос,

¹⁴Кој се даде Самиот Себе место нас, за да нè избави од секакво беззаконие и да очисти за Себе сопствен народ, кој Му припаѓа, кој ревнува за добрите дела.

¹⁵Зборувај го ова и опоменувај, и изобличувај со целосна власт. Никој да не те презира!