Read Библија, Константинов Евреите 3 Bible Online

Евреите 3 - Библија, Константинов bible

Евреите 3

¹Затоа, свети браќа, вие кои учествувате во небесното призвание, насочете ги вашите мисли кон Исуса, Апостолот и Првосвештеникот на нашето исповедување,

²Кој Му е верен на Оној, Кој Го поставил, како што беше и Мојсеј во целиот Негов дом.

³Зашто Овој е удостоен со поголема слава од Мојсеја, како што поголема чест има од куќата оној кој ја изградил.

⁴Зашто, секоја куќа некој ја гради; а Бог изградил сè.

⁵Навистина, и Мојсеј беше верен во целиот Негов дом како слуга, за да посведочи за она што имаше да се каже,

⁶а Христос како Син е над Својот дом; а ние сме Негов дом, ако ги запазиме смелоста и радоста на нашата надеж.

⁷Затоа како што вели Светиот Дух: „Денес ако го чуете Неговиот глас,

⁸не закорувајте ги вашите срца, како при огорчувањето во денот на искушувањето во пустината,

⁹каде вашите татковци се обидоа да Ме искушуваат, и ги видоа Моите дела четириесет години.

¹⁰Затоа се расрдив на тоа поколение и реков: секогаш скитаат во срцето, не ги познаа Моите патишта;

¹¹така што се заколнав во Својот гнев: нема да влезат во Мојата починка.”

¹²Гледајте, браќа, да не би во некого од вас да има лукаво срце, што не верува, та да замине од живиот Бог;

¹³туку бодрете се еден друг секој ден, додека се вели „денес”, да не би некој од вас да отрпне од измамата на гревот.

¹⁴Зашто, ние станавме Христови соучесници, само ако почетната увереност ја запазиме цврсто до крај.

¹⁵Кога се вели: „Денес ако го чуете Неговиот глас, не закорувајте ги вашите срца, како при огорчувањето.”

¹⁶Имено, кои се тие кои, откако чуја Го огорчија? Зар не сите кои излегоа од Египет преку Мојсеја?

¹⁷А на кои беше гневен четириесет години? Зар не на оние кои згрешија и чии трупови паднаа во пустината?

¹⁸А на кои им се заколна дека нема да влезат во Неговата починка, ако не на оние кои беа непокорни?

¹⁹И гледаме дека не можеа да влезат поради неверието.