Read Библија, Константинов Евреите 4 Bible Online

Евреите 4 - Библија, Константинов bible

Евреите 4

¹И така, да страхуваме да не е изостанал некој од вас, додека е уште оставено ветувањето за влегувањето во Неговата починка.

²Зашто и ние ја чувме Радосната Вест како и тие; но немаа полза од словото што го чуја, зашто не беше придружено со вера, кај оние кои го беа чуле.

³Имено, во починката влегуваме ние, кои поверувавме, како што рекол: „Така се заколнав во Мојот гнев и нема да влезат во Мојата починка”, иако делата беа свршени уште при основањето на светот.

⁴Зашто некаде за седмиот ден е речено вака: „И Бог почина во седмиот ден од сите Свои дела.”

⁵И пак на тоа место: „Нема да влезат во Мојата починка.”

⁶И така, ако останува некои да влезат во неа, а оние кои порано го чуле Евангелието не влегле заради непослушност;

⁷пак определува некој ден, „денес”, кога по толку време зборува преку Давида, како што е речено порано: „Денес ако го чуете Неговиот глас, не закорувајте ги вашите срца.”

⁸Зашто, ако Исус Навинов можеше да ги доведе во починка, не би зборувал после тоа за друг ден.

⁹Значи, на Божјиот народ му остана починката.

¹⁰Имено, кој влегол во Неговата починка, тој се одморил од своите дела, како и Бог од Своите.

¹¹И така, да се погрижиме да влеземе во Христовата починка, за да не падне некој по примерот на истата непослушност!

¹²Зашто Божјото Слово е живо, и делотворно, и поостро од секој меч остар од двете страни, и навлегува до разделувањето на душата и духот, на зглобовите и на мозокот; и ги суди мислите и намерите на срцето,

¹³и нема создание кое е невидливо пред Него; туку сè е голо и откриено пред очите на Оној, пред Кого ние ќе дадеме сметка.

¹⁴И така, бидејќи имаме Голем Првосвештеник, Кој поминал низ небесата - Исуса, Божјиот Син, да се држиме цврсто за исповедувањето!

¹⁵Зашто, немаме првосвештеник кој не може да сочувствува со нашите слабости, туку Кој бил искушуван во сè како нас, освен гревот.

¹⁶И така да пристапуваме смело кон престолот на благодатта, за да примиме милост и за да најдеме благодат, за помош, во време на потреба.