Read Библија, Константинов 1 Петар 2 Bible Online

1 Петар 2 - Библија, Константинов bible

1 Петар 2

¹И така, положете ги настрана: секоја злоба и секаква измама, и лицемерство, и завист, и секаква клевета.

²Како новородени деца, копнејте по чисто духовно млеко на словото, за да пораснете преку него за спасение,

³ако сте вкусиле дека Господ е добар.

⁴Пристапете при Него, живиот Камен, Кого навистина луѓето Го отфрлија, но Кој е од Бога избран, и скапоцен,

⁵та дозволете од самите вас, како живи камења, да се изгради духовен дом, свето свештенство, за да принесувате духовни жртви, кои Му се пријатни на Бога, преку Исуса Христа.

⁶Зашто пишува во Писмото: „Еве, поставувам во Сион аголен Камен, одбран и скапоцен; и кој верува во Него, нема да се посрами.”

⁷Така, за вас, кои верувате, Тој е скапоцен; а за оние кои не веруваат: „Каменот, кого го отфрлија ѕидарите, но Кој стана аголен камен,”

⁸и „камен за сопнување, и стена на соблазнување,” на која се сопнуваат оние, кои се непокорни на словото: за што се и определени.

⁹А вие сте избран род, царско свештенство, свет народ, народ придобиен, за да ги прогласите славните дела на Оној, Кој ве повика од темнина во Својата чудесна светлина;

¹⁰вие кои некогаш не бевте народ, сега сте Божји народ; вие кои некогаш не бевте помилувани, сега сте помилувани.

¹¹Возљубени, ве молам: како туѓинци и придојденици да се воздржувате од телесните желби, зашто тие војуваат против душата.

¹²Однесувајте се добро меѓу народите, така што токму во она за што ве клеветат како злосторници; врз основа на вашите добри дела, кога ќе ги видат, да Го прослават Бога во денот на посетата.

¹³Заради Господа покорувајте и се на секоја човечка власт: било на цар, како врховник,

¹⁴било на управителите, како негови пратеници, за да ги казнуваат злосторниците, а да ги пофалуваат оние, кои прават добро!

¹⁵Зашто ова е Божја волја: правејќи добро да го замолкнете незнаењето на неразумните луѓе,

¹⁶како слободни; и не како оние, кои ја употребуваат слободата како покрив на злобата, туку како Божји слуги!

¹⁷Почитувајте ги сите, љубете го братството, бојте се од Бога, почитувајте го царот!

¹⁸Слуги, покорувајте им се на своите господари со целосен страв, но не само на добрите и кротките, туку и на суровите!

¹⁹Зашто тоа е благодат, кога некој страда несправедливо и поднесува маки, заради сознанието за Бога.

²⁰Имено, каква е пофалбата ако трпите, кога ве казнуваат за вашите престапи? Но, ако страдате и трпите, кога правите добро, тоа е благодат од Бога.

²¹Зашто за тоа сте повикани, зашто и Христос страдаше за вас и ви остави пример, за да врвите по Неговите стапки.

²²Тој не направи грев и не се најде измама во Неговата уста.

²³Тој, Кој беше навредуван, не враќаше со навреда; кога страдаше - не се закануваше, туку се предаде Себеси на Оној, Кој суди праведно.

²⁴Тој Сам во Своето тело ги понесе нашите гревови на дрвото, та ние, умирајќи за гревовите, да живееме за правдата; преку Неговите рани се исцеливте.

²⁵Зашто скитавте како овци, но сега се вративте при Пастирот и Чуварот на вашите души.