Read Библија, Константинов Судии 10 Bible Online

Судии 10 - Библија, Константинов bible

Судии 10

¹По Авимелеха стана Тола, синот Фуев, син Додов, за да го избави Израел. Тој беше од Исахаровото племе, а живееше во Самир, во Ефремовата Гора.

²Му беше судија на Израел дваесет и три години, а кога умре, го погребаа во Самир.

³По него стана Галатецот Јаир, кој му беше судија на Израел дваесет и две години.

⁴Имаше триесет синови, кои јаваа на триесет ослиња и имаа триесет градови, што се наречени до денешен ден Јаирови Села, а се наоѓаат во Галадската Земја.

⁵Кога умре Јаир, го закопаа во Камон.

⁶Израелевите синови продолжија да прават зло пред Господовите очи. Им служеа на ваалите и на астартите, на арамејските богови и на сидонските богови, на боговите на Моавците и на боговите на Филистејците. А Го напуштија Господа и веќе не Му служеа.

⁷Тогаш Господ пламна со гнев и ги предаде во рацете на Филистејците и Амонците.

⁸Оттогаш тие ги угнетуваа и ги измачуваа Израелците осумнаесет години - сите Израелци кои живееја отаде Јордан, во Аморејската Земја, што е во Галад.

⁹Потоа Амонците поминаа преку Јордан за да завојуваат и против Јуда и Венијамин, и против Ефремовиот дом, па Израел се најде во голема неволја.

¹⁰Тогаш Израелевите синови извикаа кон Господа, велејќи: „Грешевме кон Тебе зашто Го оставивме Господа, нашиот Бог, за да им служиме на ваалите.”

¹¹А Господ им одговори на Израелците: „Нели ве угнетуваа Египетците и Аморејците, Амонците и Филистејците,

¹²Сидонците, Амаликците и Маонците? Но кога извикавте кон Мене, нели ве избавив од нивните раце?

¹³А вие ме оставивте Мене и почнавте да им служите на други богови. Заради тоа не ќе ве избавам веќе.

¹⁴Одете и викајте им за помош на оние богови што сте ги избрале! Тие нека ве избават од вашата неволја!”

¹⁵Израелевите синови Му одговорија на Господа: „Согрешивме! Прави со нас што Ти е угодно, само избави нè денес!”

¹⁶И ги отстранија туѓите богови и почнаа пак да му служат на Господа. А Господ веќе не можеше да трпи Израелците да патат.

¹⁷Кога Амонците се собраа и се влогорија во Галад, се собраа и Израелците и се влогорија во Миспа.

¹⁸Тогаш народот и галадските началнци си рекоа едни на други: „Кој човек ќе нè поведе во бој против Амонците, нека биде началник на сите жители на Галад.”