Read Библија, Константинов Судии 5 Bible Online

Судии 5 - Библија, Константинов bible

Судии 5

¹Во тој ден Девора и Варак, синот Авиноамов, ја запеаја оваа песна:

²”Борбено ги растурија коските израелските борци; и народот тргна доброволно: Благословувајте Го Господа!”

³”Чујте, о цареви! Послушајте, кнезови! Јас му пеам песна на Господа, јас Го славам Господа, Израелевиот Бог.”

⁴”Господи, кога слегуваш од Сир, кога чекореше победнички низ Едомските Полиња, сета земја се тресеше, небесата лееја, облаците врнеа со дожд.

⁵Горите се тресеа пред Тебе, о Господи, самиот Синај од присуството на Господа, Израелевиот Бог!”

⁶”Во деновите на Самегар, синот Анатов, во деновите на Јаила запустеа патиштата; и оние кои што патуваа, обиколуваа наоколу.

⁷Водачите престанаа во Израел, престанаа додека не станав јас, Девора, додека не станав како мајка на Израел.

⁸Си избраа туѓи богови и затоа војната им застана пред вратата. За пет градови немаше ни еден штит! Ниеден цар за четириесет илјади во Израел!

⁹Моето срце чука за израелските водачи, за народот што доброволно тргнува во бој! Благословувајте Го Господа!”

¹⁰”Вие, кои јавате на бели ослици, седејќи на меки постелки, и вие кои одите по патиштата, пејте,

¹¹покрај извиците на развеселените пастири кај поилата. Нека бидат славени Господовите добротворства и Неговото владеење со Израел! И Господовиот народ слезе на вратата.”

¹²”Разбуди се, Деворо, стани! Стани, запеј песна! Храбро, стани, Вараку, води ги во робје своите поробувачи, сине Авиноамов!”

¹³”Тогаш слезе остатокот од луѓето против благородните: Господ слезе со мене против крепките.

¹⁴Од Ефрема затекоа кон долината, по нив, Венијамин стигна меѓу твоите. Од Махир настапуваат началниците, од Завулон оние што носат заповеднички жезал.

¹⁵Исахаровите кнезови беа со Девора, и Исахар, исто, тргна со Варака, побрза да го стигне во долината. Кај Рувимовите Потоци се советуваат долго.

¹⁶Зошто остана меѓу трлата за да ги слушаш блеењата на стадата? Кај Рувимовите Потоци се советуваа долго.

¹⁷Галад мируваше отаде Јордан. А зошто е Дан на туѓински бродови? Зошто Асир седи на брегот на морето? и мируваше во своите пристаништа?

¹⁸Завулон е народ што и ја вети душата на смртта, и Нефталим на висорамнините.”

¹⁹”Дојдоа цареви, војуваа, бој водеа ханаанските цареви, во Танаха, во Мегидската Вода, но не добија ни малку сребро.

²⁰Од небесните врвици војуваа, војуваа ѕвездите против Сисара.

²¹Потокот Кисон ги одвлече, потокот Кедумим, поток Кисон. Цврсто гази, моја душо!

²²Тогаш се кршеа коњските копита, од трчањето, од трчањето на јунаците.

²³’Проколнете го Мироз, - рече Господовиот Ангел, - проколнете ги, проколнете ги, неговите жители, зашто не Му дојдоа на помош на Господа, на помош на Господа со храбрите.’”

²⁴”Благословена да е меѓу жените Јаила, жената на Кенеецот Хевер, нека биде славена меѓу жените во шаторите!

²⁵Тој побара вода, таа му даде млеко, во скапоцена чинија му даде кравја маст.

²⁶Со левата рака посегна по колот, а со десната по ковачкиот чук. Го удри Сисара, му ја расцепи главата, му ја продупчи, му ја скрши слепоочницата.

²⁷падна до нозете, се одвали, легна, и падна до нозете, се сруши; и каде падна, остана мртов.”

²⁸”Низ прозорец гледа Сисарината мајка, низ прозорец наѕира, до решетката вика: ‘Колесницата не му се враќа долго: зошто им е толку бавна запрегата?’

²⁹Најмудрата дворјанка и зборува, сама себе си одговара:

³⁰’Плен најдоа па го делат: по девица на војник, по девица и по две, пленета разнобојна облека за Сисара, везена од двете страни, симната од плеќи на пленик!’”

³¹”Господи, така нека гинат сите Твои непријатели! А оние кои Те љубат нека бидат, како сонце, кога изгрева со сета своја сила!”