Read BORANA BIBLE – KITAABA WAAQA Uumama 24 Bible Online

Uumama 24 - BORANA BIBLE – KITAABA WAAQA bible

Uumama 24

¹Abrahamuuni amma ya jaare hobae, ammalle waan inni tolchu ch'ufa keesa AABBO Waaqi guddo eebiseefi.

²Guyya toko Abrahamuuni waan namicha hojattu isaati matatiini jed'e, Jiddu gudeeda kiyya lamaani harka keeyad'i, kakhad'u.

³Wonti ani fed'u, aka atini maqa AABBO Waaqa, Waaqa lafafi gubbatiini kakhattu, aka atini gurba kiyya dubra gosa Kanaani inkad'anneefi fed'a.

⁴Lafa anini iti d'alad'e d'aqi, gurba kiyya Isaaqo dubra kad'ad'u, aka inni fiit'a tiyya keesa dubra fuud'u.

⁵Ammo hojattuuni isaa waan jed'eeni, Hojja intalti anini kad'ad'uufi lafa tanati na gula galu didde ho? Gurba kanke lafa ati keesaa baateti indeebisa?

⁶Abrahamuuni waan jed'eeni, Eegad'u, lafa suni ch'allati gurba kiyya indeebisiini.

⁷AABBO Waaqi, Waaqi gubbaa, worra kiyyafi lafa fiit'a tiyya keesaa na baase, aka lafa tana anaafi d'aloota kiyyaa kennu kakhate. Inni malaika isaa si dura erga, aka atini niiti gurba kiyyaa agartu.

⁸Ammo hojja intalti atini gartu si gula deemu didde, kakhuuni tante inch'abdi, hojja suni anini dubbi siraa inqabu. Ammo ato waan feetu taate, atini gurba kiyya ch'alla achi inergini.

⁹Jennaani namichi kaani harka ufii gudeeda abba isaa Abrahamu jiddu keeyate waan inni jed'eeni kaani gula kakhate.

¹⁰Namichi hojattu Abrahamuu kaani gaala Abrahamuu kud'ani fud'ate, lafa Mesopotamia, dira duri Nahoriini keesa tau d'aqe.

¹¹Dira suni geennaani gaala fulla eelati oromachiise. Hojaani sunii galgala, fulla nad'eeni bisaani woraabachu d'at'u.

¹²Inni Waaqa kad'ate waan jed'e, Ee AABBO Waaqa, Waaqa abba kiyya Abrahamuu, arra naa eebisi, abba kiyya Abrahamuu nahi.

¹³Anini fulla eela ta dubriti dira kana d'ufte bisaani woraabattuufi jira.

¹⁴Yo isiini d'ufte, anini tokooni, Butte lafa keeyad'i, bisaani naa obaasi jed'aani. Yo isiini, D'ugi, gaala keetile bisaani inkenna naani jette, isiini niiti atini hojattu tante Isaaqo fohate ha taatu. Yo wonti kuni taate, anini aka atini kakhu sifi Abrahamu jiddu jirtu jabeesitu beekha.

¹⁵Ato inni Waaqa yaamacha inhobaafatiinu, Rebekaani ta butte dudda ira qabdu d'ufte. Isiini dubra Bethueli, ilma oboleesa Abrahamu, ka Nahori jed'ani, ka niitiini isaa Milkaani d'alteefi.

¹⁶Ammalle guddo mid'aadi, taka d'iirtileeni bira ingeenne haga isiini d'alatte. Duuba eela gabuute butte isii guutatte ke deebite.

¹⁷Namichi hojattu Abrahamuu kaani fuula ke d'ufe waan jed'eeni, Bisaani anini d'ugu butte tante keesaa naa kenni.

¹⁸Isiini waan jette, Hod'i, d'ugi, jennaani arifatte butte ufiraa fuute qabdeefi, aka inni keesaa d'ugu.

¹⁹Inni bisaani d'uge jennaani, waan isiini jette, Eegi, gaala keetile bisaani woraabe obaasa.

²⁰Arifatte bisaani naanigati nat'e, ammalle eela gabuute bisaani gaalaa woraabde, gaali ch'ufti d'uge d'eebu bahe.

²¹Namichi kaani ch'allise eje intala ilaale, aka aka Waaqi huji isaa eebisu argu.

²²Intalti gaala bisaani obaafte jennaani namichi hojattu Abrahamu qube worqi funaaniti mat'anseefi, mirga worqi lama harkati naqeefi

²³waan jed'eeni, D'ale, atini ta eenu? Mana keesani keesa fullaani anaafi waheli kiyya bulu jirti?

²⁴Intalti waan jetteeni, Anini ta Bethueliti, inni ilma Nahori, ka Milkaani d'alte.

²⁵Mana keenna keesa okhayi gaali nyaatufi fullaani isani raftanileeni injirti.

²⁶Jennaani namichi jilbifate Waaqa yaamate

²⁷waan jed'e, Maqa AABBO Waaqa, Waaqa abba kiyya Abrahamu, ha faarsani, ka kakhu abba kiyya guute. AABBO Waaqi yayu worra fiit'a abba kiyyati na qajeelche.

²⁸Intalti taani ch'eete mana haad'a d'at'e dubbi taani ch'ufa iti himte.

²⁹Oboleesi Rebeka, ka Labani jed'ani, dubbi tana d'agaye jennaani ch'ee, fulla namichi hojattu Abrahamu jiru taani d'aqe.

³⁰Labaniini yayu qubefi mirga worqi ka oboleetiini isaa ufira qabdu kaani arge, ammalle waan namichi jed'eeni ch'ufa d'agaye. Inni namicha hojattu Abrahamu kaani ka fulla afaani eela ejuuni bahe

³¹waan jed'eeni, Kooti, haga mana keenna woliini nu yaasi. Atini nama AABBO Waaqi eebiseefi. Maafi ala ejita? Mani kiyya fulla atini bultu inqaba, gaali keetileeni fulla bulti inqaba.

³²Duuba namichi mana keesa seene, ammo Labaniini alati hafe gaala hiikhe okhayafi sagale d'ibi kenneefi. Ammalle namichi bisaani worri miila d'iqatu fuud'e, hojattu Abrahamutiifi wahela isaati kenne.

³³Sagaleeni worraa d'umnaani namichi waan jed'e, Anini sagale tana inyaad'u, haga waan jechu male jed'uuti. Labaniini waan jed'eeni, Jed'i, waan jechu feetu.

³⁴Jennaani namichi dubbi taani fuud'e waan jed'e, Anini hojattu Abrahamuu.

³⁵AABBO Waaqi guddo isaa eebise dureesa tolche. Waaqi yayu ree, looni, qarsi, worqi, tisselele ta d'iiratifi ta uwale, gaala, harrele ch'ufa kenneefi.

³⁶Saraani, niitiini Abrahamu, jaaruma keesa ilma d'alteefi, innileeni ilma suni waan qabu ch'ufa kenneefi.

³⁷Inni, aka anini dubbi isaa guutu, na kakhachiise waan naani jed'e, Ilma kiyya lafa Kanaani keesa dubra inkad'atiiniifi.

³⁸Ammo fulla suni worra abba kiyya, fiit'a tiyya, d'aqi, dubra kad'ad'iifi.

³⁹Duuba waan anini Abrahamuuni jed'e, Yo intalti na gula galu didde ho?

⁴⁰Inni waan naani jed'e AABBO Waaqi, ka anini maro ch'ufa dubbi isaa ch'aqase, malaika ufii si woliini erge waan ch'ufa sii guuta, aka atini gurba kiyya intala miilo tiyya, ta fiit'a aabboo, kad'atuufi.

⁴¹Karaani atini kakhu tante jalaa baatuni toko ch'alla: hojja ati fulla fiit'a tiyya d'at'e worri si d'owate, kakhu tante ya jalaa baate.

⁴²Anini arra fulla eela d'ufe jennaani Waaqa yaamad'e waan jed'e, AABBO Waaqa, Waaqa abba kiyya Abrahamu, atini imaltu tiyya tana naa eebisi.

⁴³Anini amma kuno, fulla eela jira. Hojja intalti dubraa bisaani woraabachu d'uftu, anini bisaani d'ugu butte tante keesaa naa kenni jed'aani.

⁴⁴Yo isiini bisaani naa kennite gaala kiyyale d'eebu baafte, intalti anini gurba aabbo Abrahamuti kad'ad'u ha tanuma taatu.

⁴⁵Ato anini garaa kiyya keesa tae Waaqa kad'achu jiru, Rebekaani ta butte dudda ira qabdu eela d'ufte bisaani woraabatte. Waan anini jed'eeni, Bisaani na obaasi.

⁴⁶Isiini arifatte butte na dura qabde waan jette, Hod'i d'ugi, ammalle gaala keetile inkenna. Duuba anini bisaani d'uge, gaali kiyyaleeni d'eebu bahe.

⁴⁷Jennaani anini waan jed'eeni, Atini ta eenu? Isiini waan naani jette, Anini ta Bethueli, ilma Nahori, ka Milkaani d'altee. Duuba anini qube funaaniti mat'anseefi mirga harkati naqeefi,

⁴⁸jilbifad'e AABBO Waaqa yaamad'e maqa AABBO Waaqa guddise, Waaqa abba kiyya Abrahamu faarse, ka kara na hare worra fiit'a isaati na qajeelche, aka anini dubra worraa ilma isaati kad'ad'u.

⁴⁹Amma hojja isani Abrahamuu naatani waan dansa isa tolchu feetani, nati hima, yo tolchule imfeene nati hima, aka anini waan armaa achi tahu beekhu.

⁵⁰Jennaani Labanifi Bethueliini waan jed'ani, Wonti kunini waan Waaqa iraa d'ufe, waan nu dubbanne buufachu indandeenne.

⁵¹Rebekaani kuno tana, fuud'i deemiini. Ha niiti much'a abba kanke Abrahamu taatu, akuma AABBO Waaqi jed'e.

⁵²Namichi hojattu Abrahamu waan kana d'agaye jennaani jilbifate Waaqa yaamate.

⁵³Jennaani woya, qarsi, worqi faaya ch'ufa Rebekaa kenne. Ammalle miha dadansa oboleesa isiitiifi haad'a isiile kenne.

⁵⁴Jennaani hojattu Abrahamutiifi waheli isaa sagale nyaatani aanani d'ugani achuma bulani. Diirama lafaa kaani jennaani namichi hojattu Abrahamu waan jed'e, Anini galu fed'a, na gad'iisa, aka anini gara worra Abrahamu galu.

⁵⁵Ammo oboleesafi haati Rebeka waan jed'aniini, Laki, intalti ha haga bulti kud'anifa nu woliini teete eegi suni deemtu.

⁵⁶Ammo inni waan jed'e, Armati na intursina. AABBO Waaqi yayu imaltu tiyya eebise; amma ingala, nati eebisa.

⁵⁷Worri waan jed'eeni, Eegi, intala yaamne waan isiini jettu d'ageenna.

⁵⁸Tanaafi worri Rebeka yaame waan jed'eeni, Namicha kana gula deemu feeta? Jennaani isiini, Ee jette.

⁵⁹Tanaafi worri Rebekafi jaarti haguma duri gaafa isiini d'alatte asi isii hojattu hojattu Abrahamutiifi wahela isaa gula gad'iise.

⁶⁰Worri Rebeka eebise waan jed'e: Oboleeti, hori buli, daraari, ilmaani heddu muumme inqamne d'ali! Ilmaani tante ha nyaapa ufii d'absattuuti!

⁶¹Jennaani Rebekafi dubarti isii hojattu gaala yaabatani godaanaa kurfaani hojattu Abrahamu woliini iti d'aabatani.

⁶²Gaafasi Isaaqooni gara eela Beer-Lahai-Roiti d'ufe bita lafa Kanaani qubate.

⁶³Galgala toko ato ufumaa diida lafaa keesa deemu, gaala gadi yau arge.

⁶⁴Rebekaani Isaaqo garte jennaani gaala ira buute

⁶⁵waan hojattu Abrahamutiini jette, Nami gadeemu suni eenu? Inni waan jed'eeni, Inni abba kiyya. Jennaani Rebekaani hagogo isii fud'atte matati hagogatte fuula d'ofatte.

⁶⁶Namichi hojattu kaani waan tahe ch'ufa Isaaqoti hime.

⁶⁷Isaaqooni Rebeka waaro duri haati keesati galtutiini galate niiti tolfate. Isaaqooni Rebeka guddo jaalate, akanaani lubbu haad'ale iraa hafe.