Read BORANA BIBLE – KITAABA WAAQA Uumama 26 Bible Online

Uumama 26 - BORANA BIBLE – KITAABA WAAQA bible

Uumama 26

¹Duuba oolaani d'ibiini lafaa d'ufte, ta gaafa Abrahamu taani male, jennaani Isaaqooni gara Abimeleki hayyu Filisti, ka Gerari tau, d'aqe.

²AABBO Waaqi qara iti mullate waan jed'eeni, Misiri ind'aqini; lafuma tana keesa fulla anini, Tai siini jed'e tai.

³Arma tai, ani si woliini jiraad'e si eebisa. Lafa tana ch'ufa sifi ilmaani teeti kenna. Anini kakhu Abrahamu abba kanketi kakhad'e inguuta.

⁴Anini ilmaani heddu ta haga urji garaa Waaqa geetu sii kenne lafa tanale ch'ufa ilmaani sunii kenna. Gochiti ch'ufti ilmaani tante gula eeba argatti.

⁵Wonti anini si eebiseefi waan Abrahamuuni na d'agaye seerafi aadaafi fed'i tiyya ch'ufa guuteefi.

⁶Duuba Isaaqooni Gerari tae.

⁷Jennaani worri lafa suni, Niitiini tuni maani sii taati? Jed'e gaafate. Jennaani inni, oboleeti tiyya jed'eeni. Inni, Isiini niiti tiyya jechu sodaate wonti akanatiifi waan worri isa ijeese niiti isaa mid'aadu ta Rebeka jed'ani iraa fud'atu sehe.

⁸Isaaqooni lafa suni keesa ture jennaani diirama toko Abimelekiini qaa manatini millate isaafi Rebeka ka woliini tabatani arge.

⁹Abimelekiini Isaaqo yaame waan jed'eeni, Ada isiini niiti teeti? Atini maafi, Isiini oboleeti tiyya naani jette? Isaaqooni waan jed'eeni, Anini waan na ijeesani sehe, yo anini, Isiini niiti tiyya jed'e.

¹⁰Jennaani Abimelekiini waan jed'e, Atini maafa akana nu tolchite? Jara kiyya keesa nami toko sila ya niiti teetiini rafe wollaala keesa nu buuse.

¹¹Abimelekiini nama ufii ch'ufa gorse waan jed'eeni, Nama nama kanafi niiti isaale tuqu inijeesani.

¹²Isaaqooni mid'aani lafa suni keesati fach'aafate, maro d'ibba toko haga duri fach'aase kaani ira murate ganna suni keesa; wonti akanatiifi AABBO Waaqati akasi isaa eebise.

¹³Duuba inni guddo wo horate dureesa beekhani tahe.

¹⁴Waan inni ree guddofi looni karra heddutiifi ammalle hojattu heddu qabuufi, worri gosa Filisti isa d'iibifate.

¹⁵Tanaafi eela hojattuuni Abrahamuu, gaafa inni jiru, qotte ch'ufa biyyeeni timfani.

¹⁶Abimelekiini waan Isaaqooni jed'e, Lafa tana keesaa deemi, ya irre nuraa horatte.

¹⁷Jennaani Isaaqooni achii kae, bale Gerari keesati qubate achi tae.

¹⁸Inni eelaani gaafa Abrahamuuni jiru qotani, ta eege Filistiini Abrahamuuni due jennaani timfite, deebie qote, ammalle maquma duri abbaani baaseefi kaani baaseefi.

¹⁹Jennaani hojattuuni Isaaqoo eela toko laga keesati qonnaani madda yaatuuni baate.

²⁰Tissituuni Gerari, Bisaani kunini keenna jette, tissitu Isaaqotiini irati wold'abani. Tanaafi Isaaqooni eela suni maqa Eseki baaseefi, waan irati wold'abaniifi.

²¹Hojattuuni Isaaqoo eela d'ibi qotte jennaani kanale irati wold'abani, tanaafi inni maqa Sitna baaseefi, akasi jechaani nyaapooma jechu.

²²Achi godaane fulla d'ibiti eela qotate. Ammo kana irati nami wolind'amne. Tanaafi maqa Rehobothi baasanifi, akasi jechaani Ballinna jechu. Inni waan jed'e, AABBO Waaqi ya ballinna nuu kenne, amma guddo horanna.

²³Jennaani inni artii kae Beershebati godaane.

²⁴Halkanuma suni AABBO Waaqi iti mullate waan jed'eeni, Anini Waaqa abba kanke Abrahamuuti. Woma insodaatini, si woliini jira. Anini si eebise ilmaani heddu sii kenna, maro hojattu tiyya Abrahamutiifi.

²⁵Isaaqooni fulla sorio iti qalani mid'aase achiti AABBO Waaqa yaamate. Jennaani waaro d'aabate qubate, hojattuuni isaa eela d'ibi qotte.

²⁶Abimelekiini Gerari bahe, nama isaa mala d'au, ka Ahuzathi jed'anifi gudda askarti isaa, ka Fikoli jed'ani, woliini Isaaqo argu d'aqani.

²⁷Isaaqooni waan jed'eeni, Isani amma maafi na argu d'uftani, ka duri na jibbitani lafa teesani keesaa na haatani?

²⁸Worri waan jed'e, Nu ya agarre aka AABBO Waaqi si woliini jiru, tanaafi wonti nu feenu aka wolti kakhanne wold'annuu,

²⁹aka atini waan hamtu nu intolchine, akuma nuleeni waan hamtu si intolchini. Nu sii naane nagayaani si gad'iimne. Amma ya agarre, aka AABBO Waaqi si eebise.

³⁰Isaaqooni hori qaleefi, nyaatani d'ugani quufani.

³¹Boriyya diirama wolti kakhatani, nagaya wolti d'aamatani, nagayaani gargari bahani.

³²Guyyuma suni hojattuuni Isaaqoo d'ufte waan eela qotte kaani iti himte, Ya bisaani arganne jetteeni.

³³Inni eela suni maqa Shiba yokhaani Kakhu baaseefi. Diri Beersheba tana ira maqa argate.

³⁴Esauuni ganna afurtamati dubra gosa Hiti lama fuud'e: toko Yudithi, intala Beeri, taani Basemathi, intala Eloni jed'ani.

³⁵Isiini lamaani Isaaqofi Rebeka jireenna yakite.