Read BORANA BIBLE – KITAABA WAAQA Uumama 3 Bible Online

Uumama 3 - BORANA BIBLE – KITAABA WAAQA bible

Uumama 3

¹Duuba bineensa AABBO Waaqi uume ch'ufa keesa bofati ira malticha. Waan inni niitiini jed'e, Ila, d'uguma Waaqi, Mukha oobru tana keesa jiru tokole inyaatina isaniini jed'e?

²Niitiini taani waan jetteeni, Mid'aani mukha oobru tana keesa jiru kama feenu nyaanna, ammo

³Waaqi waan nuuni jed'e, Mid'aani mukha wod'aka oobru keesa eju inyaatina, yokhaani inqabatina, yo nyaattani indootani jed'e.

⁴Ammo bofi waan niitiini jed'e, Laki, akasiniti, indootani.

⁵Waaqi imbeekha, aka guyya isani nyaattani, ilti teesani banamte, aka Waaqa taatani, waan hamtufi dansa gargari beetani.

⁶Duuba niitiini aka mid'aani mukha suni nyaataa dansatiifi ilaa mid'aago agarte, ammalle aka isaani hubacha namaa kennani d'ageennaani buqifte nyaatte d'iirsale kennite innileeni nyaate.

⁷Duuba worra lachu ilti banamte, aka qulla yaani ufi argani, obeensa odaa wolti qabani qullaani d'ofatani.

⁸Galgala suni AABBO Waaqa oobru keesa deemu d'agayani jennaani d'iirsafi niitiini isaa mukha duubati d'okhatani.

⁹Ammo AABBO Waaqi namicha yaame, Atini eesa jirta? Jed'e gaafate.

¹⁰Inni waan jed'e, Anini ejata kanke oobru keesati d'agaye, aka qulla deemu ufi arge, duuba sodaad'e d'okhad'e.

¹¹Inni waan jed'eeni, Eenuti, Qulla deemta siini jed'e? Atini mid'aani anini, Inyaatina isaniini jed'e kaani ya nyaatte?

¹²Namichi waan jed'eeni, Niituma atini wahela naa kennite taaniti natiini d'ufe na nyaachise.

¹³AABBO Waaqi waan niitiini jed'e, Wonti atini taate kunini maal? Niitiini waan jetteeni, Bofati na sobe jennaani nyaad'e.

¹⁴Jennaani AABBO Waaqi waan bofaani jed'e, Waan atini akana taateefi, anini la si abaare, atini horifi bineensa ala ch'ufa iraa gorte garaani lafa ira loote haga jirtu ch'ufa biyye nyaatta.

¹⁵Anini siifi niiti tana nyaapa wolti tolche, d'alooti keesanileeni woli jibba. D'alooti isii mata si ch'arase, atileeni hirba worraa nyaatta.

¹⁶Ammalle waan inni niitiini jed'e, Hojja atini garaachooftu d'iba siti guddise, hojja atini d'altule ch'ininfatte d'ukubsatta; ammo ha taatuti, d'iirsa kanke guddo jaalatte d'araateefi, innileeni si mohata.

¹⁷Ammalle waan namichaani jed'e, Waan atini qonqo niiti teeti ch'aqafte, mid'aani mukha anini, Inyaatini siini jed'e nyaatteefi, lafafi biyyeeni siifi abaaramti; iti gaargaltu male sagale keesa inyaattu, haga jireenna keeti ch'ufa.

¹⁸Isiini hogorafi qoraati siti baafti, atileeni raafu nyaatta.

¹⁹Hojatte damfitu male, sagale inyaattu, haga biyye keesaa baateti deebituuti; atini qara biyye, biyyuma suniti deebita.

²⁰Namichi niiti maqa Hawai baase, waan isiini haad'a nama ch'ufa taateefi.

²¹AABBO Waaqi namicha Adamu jed'anifi niiti isaa goga bineensa fuud'e gaad'a mid'aaseefi uyiseefi.

²²Jennaani AABBO Waaqi waan jed'e, Namichi kunini ya akuma keenna tahe waan hamtufi dansa gargari hubate. Tanaafi inni amma tana harka d'eerefate mid'aani mukha jireennaa buqise nyaate haga jiru jireenna jiraachuuni himmalle.

²³Tanaafi AABBO Waaqi oobru Edeni keesaa gusse biyye isa iraa mid'aasani qotachiise.

²⁴Inni namicha oobru keesaa had'e balleese jennaani, oobru Edeni keesa, gama ilaboru, waan lubbu qaba, ka aka malaikatiifi aflameedi bibillit'u ta gara ch'ufa martu kaye, aka akasiini wonti sunini kara mukha jireennati deemu nama iraa eeddu.