Read BORANA BIBLE – KITAABA WAAQA Uumama 43 Bible Online

Uumama 43 - BORANA BIBLE – KITAABA WAAQA bible

Uumama 43

¹Beelti lafa Kanaani haga qarale ira hammaatte,

²duuba eegi worri Yakobo mid'aani Misiri galateeni kaani nyaate fit'e, Yakobooni waan ilmaani isaatini jed'e, Beena, dachaa, mid'aani diqo toko ammalle nuu bita.

³Ammo Yudaani waan jed'eeni, Namichi aka jaba nuti d'aame waan nuuni jed'e, Oboleesa keesaniini d'uftani male, fuula kiyya dura imbahiina.

⁴Yo atini oboleesa keenna nu gula ergite, nu deemne sagale sii binna.

⁵Yo didde, nu iyyaanuyu, wonti akanatiifi namichi waan nuuni jed'e, Oboleesa keesaniini d'uftani male, fuula kiyya dura imbahiina.

⁶Yakobooni waan jed'eeni, Isani maafi namichaani, Oboleesa d'ibi qamna jettani na gaargalchitani?

⁷Worri waan jed'eeni, Namichi waan worra keenna gaafate lakisu dide. Abbaani keesani inuma jira? Oboleesa d'ibi qabdu? nuuni jed'e. Nu gaafi isa gula akasi jenneeni. Nu akamiini beena, aka inni, Oboleesa keesaniini koota nuuni jed'u?

⁸Yudaani waan abbaani jed'e, Gurba na gula ergi, ammuma tana yaana, aka nu nami diqafi guddaani tokoleeni beelaani indoone.

⁹Dua jireenni isaa gubbaa tiyya. Yo anini nagayaani sii galche si dura ind'aabiini, haga jiru jireennale wollaali ha kiyya tahu.

¹⁰Ato akana turu baanne, sila maro lamale ya yaane dachaane.

¹¹Abbaani waan worrani jed'e, Yo akasi male intaatu jettani, waan lafti teenna baaftu dansa ch'ufa, ta aka hampefa, dammafa, qumbifa, waan aka ogomdifa qolaatifa guura, namicha guddaa geesa.

¹²Ammalle beese tana male, beese subba keesati isanii deebisani taanile fuud'a, hegeri wollaalafi isanii deebisani.

¹³Oboleesa keesani fud'ad'a, beena yaa.

¹⁴Waaqi Guddaani namicha isani naasisinna, aka inni Benjaminifi oboleesa keesani kaani gadi deebisu. Yo ilmaani tiyya d'abu male, ha d'abuti.

¹⁵Jennaani worri waan namichaa geesani sunifi beese mid'aaniini bitatani haga duri kaani ira maro lama fuud'ani, Benjaminile woliini kaani, lafa Misiri d'aqani, fuula Yusufu dura d'ufani.

¹⁶Yusufuuni Benjamini worra birati arge jennaani waan hojattu isaatini jed'e, Worra kana mana kiyya geesa, arra saa jaa sagale woliini nyaanna, tanaafi hori qala, waan ch'ufa kurfeesa.

¹⁷Hojattuuni taani aka iti himani kaani guute worra mana Yusufuu geesite.

¹⁸Ato manati geesanu, worri nahe waan jed'e, Waan armaani nu d'ufanifi maro beese subba keenna keesati deebisanifi, amma hegeri maruma toko nu had'ani harrele teenna guuratani tisse nu tolfatani.

¹⁹Duuba fulla balbala mana isaa gahani jennaani waan nama huji mana suniti matatiini jed'ani,

²⁰Aabbo, nu qara sagale binna jenne arma d'umne.

²¹Duuba karaati bulti miha hiikhanne jennaani nu namu beese qara mid'aaniini bitanne taani afaani subba keennati argine, beeseeni suni tokochi qubaleeni inhamne, amma layu sitiini d'umne.

²²Ammalle beese sagaleeni bitannu d'ibiini ya d'umne. Nama beese teenna nuu deebise nu imbeennu.

²³Inni waan jed'eeni, Iyyaaliina, insodaatina, Waaqi keesani, Waaqi abba keesani, beese teesani hegeri subba keesaniti deebise. Anini ufi tiyya beese teesani ya fud'ad'e jed'e, Simeoni worratiini d'ufe.

²⁴Duuba inni worra kaani mana Yusufutiini d'ufe bisaani worri miila d'iqatu kenneefi harrele worrale mid'aani kenne.

²⁵Duuba worri waan Yusufu d'ufeeni kaani, aka saa jaa hojja inni d'ufu iti kennu, kurfeese. Wonti akanatiifi aka worri sagale isa woliini nyaatu ya iti himani.

²⁶Yusufuuni gale jennaani waan d'ufaninifi kaani kurfeesani itiini d'ufani durati gadi jejed'ani.

²⁷Inni nagaya worra fuud'e waan jed'eeni, Jaarsi abba keesani ka isani baantani kaani jira? Inni baraa fayyaa?

²⁸Aabbo, abbaani keenna inuma jira, baraa fayyaa jed'ani durati gajejed'ani.

²⁹Yusufuuni oboleesa isaa Benjamini, ka isaani garaa, arge jennaani waan jed'e, Ila, gurbaani isani baantani, ka oboleesa keesani kaani, kana? Waaqi si eebisinna, gurba kiyya.

³⁰Akasi jed'e jennaani maro oboleesa isaatiifi onneeni laafte bohu fed'e, worra biraa deeme dinqa olseene bohe.

³¹Jennaani fuula d'iqate gabahe ufi d'owe, Sagale nuu baasa jed'e.

³²Yusufu sagale kobaa baasani, oboleyaani isaale akasuma kobaa baasani, worra Misirile, ka achiti nyaatu kobaa baasani, wonti akanatiifi worri Misiri worra Ebraniatini woliini nyaachaani worraa falfala.

³³Oboleyaani Yusufu isati fuula deebisani tetesisani, akuma isiini d'aloota wolti aantuuni. Akasi argani jennaani woli mimilatani mamani maadefatani.

³⁴Duuba sagale mesa Yusufuuni irati nyaatu iraa fuud'ani worra ch'ufaa kennani, ammo sagale Benjamini kennani ta worra kaani ira maro shani dabarsani. Duuba nyaatani d'ugani quufani, Yusufu woliini gammadani.