Read BORANA BIBLE – KITAABA WAAQA Uumama 8 Bible Online

Uumama 8 - BORANA BIBLE – KITAABA WAAQA bible

Uumama 8

¹Waaqi Nuhufi bineensafi hori isa woliini hobolo keesa jira ch'ufa qaabate, bubbe bubbise bisaani gadeebise.

²Bisaani gubbaa baafatanifi jala farqatani kaani ch'ufti ch'itani, bokeenileeni ch'aame,

³bisaani laanuma haga bulti d'ibbafi shantama gadeebiani.

⁴Guyya kud'ani torbeeso, jia torbeeso, hobolooni d'ufte gaara Ararati ira teete.

⁵Duuba bisaani d'iqaachuma diqaatani, guyya qara ka jia kud'anneeso fiit'eeni gaareeni mumullatte.

⁶Guyyaani afurtama hobae jennaani Nuhuuni deresha hobolo inni jaare taani bane,

⁷haranqeesa toko alati gad'iise. Ammo haranqeesi suni hoboloti deebiu dide, haga bisaani fooqataniti lafa mare.

⁸Jennaani sabaliisa tokole alati gad'iise, aka inni aka bisaani fooqatani laalu;

⁹ammo sabaliisi waan bisaani lafa ira imfoqatiiniifi, fulla tau d'abe, hoboloti deebie; Nuhuuni harka alati baafate fuud'e hoboloti deebise.

¹⁰Nuhuuni torba bule jennaani ammalle maro lameeso sabaliisa alati gad'iise.

¹¹Sabaliisi kaani ka baala ejersa doti afaani qabu galgala isati deebie. Duuba Nuhuuni akanaani aka bisaani fooqatani hubate.

¹²Ammalle torba bule, maro sadeeso sabaliisa kaani gad'iise. Ammo gaafa kana inni iti deebiu dide achumaani hafe.

¹³Ganni Nuhu d'ibba jaafi toko geennaani, guyya qara ka jia qara, bisaani fooqatani. Jennaani Nuhuuni hobolo gubbaa buqise, gama ch'ufa millate lafa goddu arge.

¹⁴Jia lameeso, guyya diddami torba geennaani, lafti godde kawifte.

¹⁵Jennaani Waaqi waan Nuhuuni jed'e,

¹⁶Siifi ilmaani teetifi niiti teetifi ammalle nad'eeni ilmaani teeti ch'uftinu hobolo keesaa baha.

¹⁷Waan lubbu qaba ka hobolo keesa jiru ch'ufa gadi baasi, simpirrele taanaani, bineensa taanaani, hori taanaani, ammalle waan lafa ira lohu taanaani ch'ufa gadi baasi, aka worri hore lafa guute deebanu.

¹⁸Duuba Nuhufi ilmaani isaatiifi niiti isaatiifi nad'eeni ilmaani isaa ch'ufti hobolo keesaa bahani.

¹⁹Wonti lubbu qaba ch'ufti, simpirre taanaani, bineensa taanaani, hori taanaani, ammalle waan lafa ira lohu taanaani ch'ufti hobolo keesa, aka woli d'alani gula, woliini gadi yaate.

²⁰Jennaani Nuhuuni fulla sorio iti qalani AABBO Waaqaa jaare, bineensafi simpirre gosa ch'ufa, ka nami nyaatu toko tokooni keesa fuud'e, gube sorio fulla suniti Waaqaa baase.

²¹AABBO Waaqi ch'inch'a fooni gubani suni suufe jennaani waan ufiini jed'e, Anini deebie namaa jed'e lafa inabaaru, ato heregi garaa isaa haguma inni d'alate hamale tahe, yokhaani anini waan lubbu qaba aka qara balleese kana deebie imballeesu.

²²Haga lafti jirtu, oobrachafi murachaani, qabanafi owi, bonaafi roobi, yokhaani halkanifi guyyaleeni deebite imbaddu.