Read BORANA BIBLE – KITAABA WAAQA Uumama 9 Bible Online

Uumama 9 - BORANA BIBLE – KITAABA WAAQA bible

Uumama 9

¹Waaqi Nuhufi ilmaani isaati eebise waan jed'eeni, Hora bula, daraara, lafa ira dabra.

²Bineensi ch'uftinu, simpirre taanaani, qurt'umi taanaani, bineensa garaani lafa ira lohu taanaani ch'ufti harka kanke ke jira, si sodaata.

³Waan lubbu qaba ch'ufa, mukhaafi bineensale, ya sii kenne, aka isiini sagale sii taatu.

⁴Ammo fooni d'iigi keesaa imbahini inyaatina, wonti akanatiifi jireenni d'iiga ke jira.

⁵Yo d'iiga keesani buusani, anini gati ira qaba. Yo nami yokhaani bineensi d'iiga suni buusele, anini gati ira qaba.

⁶Ka d'iiga namaa buuse, namati d'iiga buusa; wonti akanatiifi Waaqi fakeenna ufii gula nama mid'aase.

⁷Amma duuba isani hora deebana, dagaaga daga hora.

⁸Waaqi waan Nuhufi ilmaani isaatini jed'e,

⁹Anini amma wold'aqisa sifi ilmaani tante woliini tolfad'a,

¹⁰ammalle waan lubbu qaba, simpirre taanaani, looni taanaani, bineensa d'ibile taanaani, ka atini hobolo keesaa woliini baate ch'ufa wold'aqisa woliini tolfad'a.

¹¹Wold'aqisi anini si woliini tolfad'u kana: armaa achi waan lubbu qaba tokole iti deebiani bisaanini lafa iraa inhobaasani; ammalle lolaani deebie fach'ae lafa imballeesu.

¹²Waaqi waan jed'e, Akheekhi wold'aqisa ka anini sifi waan lubbu qaba ka si woliini jiru ch'ufaani haga jiru jireenna tolfad'u kana:

¹³Anini ule tiyya gubbaa dumansa keesa d'aaba, isiini duuba akheekha wold'ageeti tiyyatiifi ta lafa ch'ufa taati.

¹⁴Hojaani anini gubba dumansaani d'osse ule tiyya keesa d'aabe,

¹⁵wold'ageeti anini sifi waan lubbu qaba woliini tolfad'e inqaabad'a; duuba fach'ai bisaani ituma deebie waan lubbu qaba imballeesu.

¹⁶Yo anini ule tiyya ta dumansa keesa mullattu argu, anini wold'aqisa jiru jireenna ka sifi waan lubbu qaba ch'ufa woliini tolfad'u qaabad'a.

¹⁷Sunini akheekha anini sifi waan lubbu qaba ch'ufa woliini tolfad'e.

¹⁸Ilmaani Nuhu ta hobolo keesaa yaate, Shemu, Hamu ammalle Yafethi. (Hamuuni abba Kanaani.)

¹⁹Nami ch'ufti ka lafa keesa jiru ilmaani Nuhu tana sadeeni iraa hore.

²⁰Nami qara oobru qote zabibu keesati oobre Nuhu.

²¹Inni daad'i d'uge machae, woya ufiraa baase, waaro ufii keesa qulla ch'iise.

²²Duuba Hamuuni, ka abba Kanaani, aka abbaani qulla waaro isaa keesa ch'iisu arge jennaani gabahe, d'aqe oboleyaani isaa taani lamaaniti hime.

²³Jennaani Shemufi Yafethiini woya fuud'ani, gurmu ira keeyatani duddubaani yaani, woya iti uyisani, mata dalla qabatani, aka qulla abbaa ingarre.

²⁴Nuhuuni machiini iraa galte jennaani waan gurbaani isaa maand'ichi isa tolche beekhe

²⁵waan jed'e: Kanaani ha abaaramu! Ha tisse oboleyaani isaa tahu.

²⁶Ammalle inni waan jed'e, AABBO Waaqi ha worra Shemu eebisu; Kanaaniini ha tisse Shemu tahuti.

²⁷Waaqi ha Yafethi daraarsu! Ilmaani isaaleeni ha Shemu woliini teetu! Kanaaniini ha tisse Yafethi tahuti.

²⁸Eegi fach'aa lolaa kaani, Nuhuuni ganna d'ibba saditiifi shantama tae.

²⁹Ganni Nuhu, gaafa inni due, d'ibba sagalifi shantama.