Read BORANA BIBLE – KITAABA WAAQA 2 Samueli 17 Bible Online

2 Samueli 17 - BORANA BIBLE – KITAABA WAAQA bible

2 Samueli 17

¹Eegi suni Ahithofelini waan Absalomuni jed'e, Eegi nama kaima kud'ani lama fohad'e, halkanuma kana Daudi reebe,

²isaa ka dad'abe ufi jibbaate had'e balleesa. Akanaani inni bahe, worri isaa woliini jiruleeni ch'ufti biraa baqate. Anini hayyu ch'alla ijeesa,

³ammo jara isaa kaani ch'ufa, akuma niiti badde ta d'iirsati galchani, sitiini gala. Atini nama toko ch'alla ijeesu feeta, gumiini taani nagumaani baati.

⁴Absalomunifi jaaroleeni Israeli ch'ufti mala kana maachite.

⁵Absalomuni waan jed'e, Hushai gayaama, waan inni jed'u d'ageenna.

⁶Hushaini d'ufe jennaani, Absalomuni waan jed'eeni, Mali Ahithofelini nu d'ae kana; gula yaana? Yo gula yau baane atumaani kanke nuu d'ai.

⁷Husaini waan jed'eeni, Mali Ahithofelini arra si d'ae kunini dansaniti.

⁸Atini imbeeta, abbeetifi jari isaa worra woraana jaba ka goorjama ilme jala qabani ka tae dutu fakaatu. Abbe nama waan woraana guddo beekhu inni halkani askarti woliini imbulu,

⁹hegeri yona goda d'akha yokhaani fulluma d'ibiti d'okhachuu jira. Yo Daudini askarti tante had'e, nami waan suni d'agayu ch'ufti, askarti Absalomu ya balleesani jed'a.

¹⁰Duuba nami janni aka nyeench'aleeni insodaata wonti akanatiifi nami Israeli keesa jiru ch'ufti aka abbe nama duula jabaatifi ammalle askartini isaaleeni worra woraana jajaba beekha.

¹¹Duuba mali kiyya kana! Worra Israeli haguma gahuuni ka haga Dani eje Beershebati eju ka haga maansa afaani galaana gahu, wolti yaami atumaani duulini.

¹²Daudi fulla inni jiru barbaanne ato inni imbekane haana, duuba isaafi nami isaa tokoleeni inhafu

¹³yo inni dirati baqate nami keenna ch'ufti haadani d'ufe dira suni baleeti hirkisa, d'akhaani dira sunini jaarani ka gaara suni irati hafu injiru.

¹⁴Absalomufi worri Israeli ch'ufti waan jed'e, Mali Hushai ka Ahithofeli ira jira. Wonti AABBO Waaqi mala Ahithofeli dansa suni gula deemu nama d'owefi, aka badiini Absalomu d'aqabdu.

¹⁵Jennaani Hushaini jara qaalole Sadokifi Abiathari mala inni Absalomufi jaarole Israeliti d'aefi ka Ahithofelini d'ale, iti hime.

¹⁶Inni waan jed'e, Amma waan isani tatani, hurrisa, qonqo Dauditi erga, aka inni arra afaani malka lafa aloo suni imbulle, ammo galaana Yordani yoosu taaku, aka isaafi worra isaa ch'ufa qabani infind'e.

¹⁷Ilmi Abiathari ka Yonathani jed'anifi ilmi Sadoki ka Ahimaasi jed'ani maddo Enrogeliti gorani aka worra dira seenu nami ingarre. Duuba intalti hojatu toko hojja ch'ufa d'ufte odu lafaa worrati himte, worrileeni deeme hayyu Dauditi hima.

¹⁸Ammo gaafa toko gurbaani toko worra arge, d'ufe Absalomuti hime; jennaani worri baqate mana namicha toko ka Bahurimu jiruti d'okhate. Namichi suni eela d'aatu mana isaati qaba, duuba worri eela suni duude.

¹⁹Jennaani niitiini namicha suni afaani eela suni wo gubbaa afte duuchite mid'aani gubbati firfirsite, aka nami tokoleeni artiti woma insehanne.

²⁰Jari Absalomu mana niiti suni d'ufe waan jed'eeni, Ahimaasifi Yonathanini meeti? Jennaani isiini, worri ya galaana taake jetteeni. Duuba barbaadani, d'abani kaani ufira Yerusalemuti dachaani.

²¹Worri kae yae jennaani Ahimaasifi Yonathanini eela kaani keesaa yaani, d'aqani Dauditi himani waan jed'aniini, Hurrisi kai galaana taaki, Ahithofelini ya siti malate.

²²Duuba Daudifi jari isaa ch'ufti galaana Yordani taaku d'aqe; Yo lafti bariite nami tokoleeni ka intaakini injiru.

²³Ahithofelini aka mala isaa didani arge jennaani harre ufi rara ira keeyate, kae worra isati gale waan ufi ch'ufa kurfefate, ufi fannise ufi ijeese. Akanaani due, awaala worra isaani keesati awaalani.

²⁴Daudini Mahanaimu d'aqe, ammo Absalomuni worra Israeli ch'ufa woliini galaana taake.

²⁵(Absalomuni fulla Yoabu namicha Amasa jed'ani gudda askarti isaa ch'ufa tolche. Amasaani suni ilma Yethero ka gosa Ishmaeli, haati isaa Abigaili, dubra Nahashi, ammalle isiini oboleeti Seruya ta haad'a Yoabu.)

²⁶Jennaani Absalomufi jari isaa ka Israeli lafa Gileadi keesa qubatani.

²⁷Daudini Mahanaimuni bahe jennaani, Shobi, ilmi Nahasi, ka dira Raba, ka lafa Amoni keesatifi Makiri ilma Amieli ka dira Lodebaritifi ammalle Barilai ka Rogolemu lafa Gileadi keesaa d'ufeeni wolwoldaani.

²⁸Worri kunini qori okote faarati miha hiribati ammalle sagale Dauditifi ta worri isaa nyaatu: dargaye, garbu, boshe, akhaawi, halquqa, d'engo, damma, qarru, baadu, ammalle hooliye qalma, d'ufaniini waan jed'ani, Daudifi jari isaa yayu beelae d'eebote dad'abe, lafa aloo tana keesati.