Read BORANA BIBLE – KITAABA WAAQA 2 Samueli 4 Bible Online

2 Samueli 4 - BORANA BIBLE – KITAABA WAAQA bible

2 Samueli 4

¹Ishboshethini, ilmi Saulo, ijeecha Abineri ka Hebroniti ijeesani d'agaye jennaani sodaate, lubbuuni d'ufte worri Israeli ch'ufti guddo rifate.

²Ishboshethini nama lama qaba, ka Askarti isaa iti mata. Toko maqaani isaa Baana, kaani Rekabu worri lachu ilmaani Rimoni, ka worri isaa Birothi lafa worra gosa Benjamini keesa (Birothini sunileeni lafuma Benjamini.

³Nami duri lafa Birothi tau lafa Githaimuti baqate haga arrale achuma taa.)

⁴Yonathanini ilmi Saulo, ilma toko qaba ka maqaani isaa Mefiboshethi, gaafa qonqooni duuisa Saulofi Yonathani Yezreelini baate, ganni isaa shani. Intalti isa qabdu isa fuute baqateeni; ammo maro isiini arifate ch'eteenifi inni iraa lafa d'ae ch'ach'abe miila lachuyu naafate.

⁵Rekabuufi Baanani, ilmaani Rimoni, worra Ishboshethi kaani imaltu yaani guyya gudda achini bahani, ka inni ufumaa tae boqotu.

⁶Niitiini balbala eeddu, ato dargaye hafarsu jirtu, mudde rafte, duuba Rekabuufi Baanani, ka isiini quba inqamne mana olseenani,

⁷oldabrani fulla Ishboshethini rafu d'ufani isa ijeesani, ato inni ufumaa sire gubba rafu. Mata ira kutani, kaani itiini d'aabatani, halkani suni ch'ufa bale Yordani keesa yaa bulani.

⁸Mata isaa suni hayyu Daudi ka Hebroni jirutini d'ufani, waan jed'aniini, Mataani Ishboshethi, ilmi nyaapa kanke Saulo, ka si ijeesu fed'e, kuno kana. Arra AABBO Waaqi yayu nyaapa kanke Saulofi d'aloota isaa haalo si baafachise, ee hayyicha.

⁹Daudini waan worraani jed'e, Maqa AABBO Waaqa gaargala ch'ufa keesa na baaseni kakhad'a,

¹⁰namichi qonqo duisa Saulotini Ziklagiti nati d'ufe, waan odu dansaani d'ufe ufi sehe, ammo anini isa qabe ijeese. Galati anini odu isaa suni isaa kenne suni!

¹¹Ammo keessuma nama, nama woma iyyakini ka mana ufi keesa ufumaa rafu ijeese, hagasi ira wo tolchani! Amma anini haalo isaa, isani ijeese lafa ira isani balleesa!

¹²Daudini jara isatini, worra ijeesa jed'e, jennaani ijeesani, harkaafi miila iraa ch'irani, d'aatu haro Hebroniti fannisani, mata Ishboshethile fuud'ani awaala Abineri keesati Hebroniti awaalani.