Read BORANA BIBLE – KITAABA WAAQA 2 Samueli 5 Bible Online

2 Samueli 5 - BORANA BIBLE – KITAABA WAAQA bible

2 Samueli 5

¹Jennaani gochiti Israeli ch'ufti Hebroniti Dauditi d'ufte waan jetteeni, Nu foonifi d'iiga taka.

²Duri gaafa Sauloni hayyu keennale atini worra Israelitini duulte, AABBO Waaqileeni atini gumi tiyya dura deemte hayyu iti tata sini jed'e.

³Jennaani jaaroleeni Israeli ch'ufti Daudi, ka Hebroni jiruti d'ufte. Inni AABBO Waaqa durati wold'aqisa worra woliini tolfate, duuba worri isa muude hayyu Israelile isa tolche.

⁴Daudini gaafa hayyu tahe ganni isaa sodoma, duuba inni ganna afurtama worra mohate.

⁵Inni Hebroni keesa worra Yuda ganna torbafi jia jaa mohate, ammalle Yerusalemu keesale worra Israelitiifi ka Yuda ch'ufa ganna sodomi sadi mohate.

⁶Hayyu Daudifi jari isaa kurfefatini, worra Yebusi ka Yerusalemu keesa jiru, had'u d'aqani. Ammo worri Yebusi waan Daudini dandae worra had'e dira worraa fud'atu insehu, tanaafi worri waan jed'eeni, Atini dandeete ato waan feete taate arma inseentu. Ballaafi naafilleni alumati si d'owa.

⁷(Ammo Daudini dira jaba Sioni suni dabsate qabe, duuba diri suni ka isaa tahe Dira Daudi jed'aniini.)

⁸Guyya suni Daudini waan worra isaatini jed'e, Isaani nami tokoleeni ka aka kiyya kana worra Yebusi jibbe hobaasu fed'u jira? Yoosi beena, boola bisaani ta lafa jalati baqasani suni gula yaa worra naafafi balla suni had'a balleesa. (Wonti ballaafi naafi dandae Mana AABBO Waaqa iseenu jed'anifi tana.)

⁹Eegi Daudini dira jaba suni qabe, inni keesa tae, dira Daudi jed'e maqa iti baase. Inni dira suni fulla d'ooqa ta gaarani ilaborutiini jala qabate ballise marse jaare.

¹⁰Waan AABBO Waaqi Guddaani isa woliini jirufi inni jabaate gurri isaa fulla ch'ufa gahe.

¹¹Hiramuni hayyichi Tiro, nama gara Daudi erge, worra suni woliini mukha hind'eesatifi hogeeyi mukhafi d'akhaani mana jaartu ergeefi.

¹²Duuba akanaani Daudini aka AABBO Waaqi hayyu Israeli isa tolche lafa inni fidule maro gumi isaatiifi eebise hubate.

¹³Eegi inni Hebroni kae Yerusalemuti godaane, Daudini gaarayootafi nad'eeni d'ibi guure ilmaani d'iiratifi ta dubrale heddu d'ale.

¹⁴Ilmaani Yerusalemu keesati isaa d'alate tana: Shamua, Shobabu, Nathani, Solomoni,

¹⁵Ibhari, Elishaau, Nefegi, Tefia,

¹⁶Elishama, Eliadafi Elifeleti.

¹⁷Worri Filisti aka Daudi muudani hayyu Israeli tolchani d'ageennaani duula baase isa qabu d'aqe. Daudini dubbi suni jaalani d'ageennaani fulla jabdu ta nyaapa dura iti baqatini d'aqe.

¹⁸Worri Filisti bale Refaimutini bahe keesati qubate.

¹⁹Daudini AABBO Waaqa gaafate waan jed'eeni, Worra Filisti kana inhad'a? Dandae indabsad'a? AABBO Waaqi waan jed'eeni, Ee, had'i, anini dabsacha sii keenna!

²⁰Jennaani Daudini Baal-Perasimu d'aqe, achiti worra Filisti dabsate waan jed'e, AABBO Waaqi ya aka bisaani fach'aani nyaapa kiyya keesati fach'ae. Tanaafi fulla sunini Baal-Perasimu jed'ani.

²¹Worri Filisti baqannaani waan harkani boch'ani ka worri kad'atu lafati lakise jennaani Daudifi jari isaa d'ufe, guure itiini d'aabate.

²²Worri Filisti ammalle bale Refaimuti deebie keesa qubate.

²³Daudini ammalle maani tahu male? jed'e AABBO Waaqa gaafate. Inni waan jed'eeni, Arma inhad'ina, gama suni mara, fulla mukha gugurda suni dudda duubaani had'a.

²⁴Hojja isani shawesa dame mukeeni suni d'ageetani, nyaapa hobaati iti labsa had'a anati isani dura deeme worra Filisti suni isani dabsachiisa.

²⁵Daudini waan AABBO Waaqi isaani jed'e guute worra Filisti Gebaa had'e Gezerini baase.